কৰিমগঞ্জ,16 জুলাই: ক্ৰমাৎ গণ সংক্ৰমণৰ দিশে কৰিমগঞ্জৰ পৰিস্থিতি ৷ বিগত দুদিনত কৰিমগঞ্জত 29 গৰাকী লোকক দেহত ধৰা পৰিছে কৰ’ণা ভাইৰাছৰ উপস্থিতি ৷ আক্ৰান্ত উক্ত লোকসকলৰ ভিতৰৰ 19 গৰাকীৰে নাই কোনো ভ্ৰমণ বৃত্তান্ত ৷ সেয়ে জিলাখনত কৰ’ণা ভাইৰাছৰ গণ সংক্ৰমণৰ আশংকা প্ৰকাশ কৰা হৈছে ৷
উল্লেখ্যে যে, বুধবাৰে চিনাক্ত হোৱা লোকসকলৰ মাজত আছে 11 গৰাকী নাপিতৰ লগতে এগৰাকী বিউটি পাৰ্লাৰৰ কৰ্মচাৰী ৷ ইয়াৰ লগতে আক্ৰান্তৰ তালিকাত ৰে’ল আৰক্ষী আৰু অসম আৰক্ষীত কৰ্মৰত এগৰাকী ব্যক্তি সন্নিৱিষ্ট আছে বুলি জানিব পৰা গৈছে ৷ তদুপৰি কৰিমগঞ্জ ৰে’ল ষ্টেচনত কৰ্মৰত এগৰাকী ৰে’ল আৰক্ষী আৰু জিলাখনৰ আৰক্ষী নিৱেশৰ অসম আৰক্ষীৰ এগৰাকী জোৱানৰ দেহতো শেহতীয়াভাৱে ধৰা পৰিছে কৰ’ণা ভাইৰাছৰ উপস্থিতি ৷ এই ঘটনাৰ পিছতে সুৰক্ষাৰ স্বাৰ্থত কৰিমগঞ্জ ৰে’ল ষ্টেচনৰ আৰক্ষী কক্ষ আৰু জিলাখনৰ আৰক্ষী নিৱেশ ছীল কৰে প্ৰশাসনে ৷ সম্প্ৰতি জিলা প্ৰশাসনে আক্ৰান্তৰ সৈতে সংস্পৰ্শলৈ অহা ব্যক্তিসকলক চিনাক্ত কৰি স্বাৱ পৰীক্ষাৰ ব্যৱস্থা গ্ৰহণ কৰিছে ৷ তদুপৰি লক ডাউন শিথিল কৰাৰ পিছত প্ৰশাসনে বিউটি পাৰ্লাৰ আৰু চেলুন সমূহ খোলাৰ নিৰ্দেশ প্ৰদান কৰিছিল ৷ কিন্তু শেহতীয়া পৰিস্থিতিৰ প্ৰতি লক্ষ্য ৰাখি প্ৰশাসনে পুনৰবাৰ জিলাখনৰ সকলো পাৰ্লাৰৰ লগতে চেলুনসমূহ বন্ধ কৰাৰ সিদ্ধান্ত গ্ৰহণ কৰে ৷
জিলা উপায়ুক্ত এম পি আম্বামুথানেও সম্প্ৰতি কৰিমগঞ্জত কৰ’ণা ভাইৰাছ গণ সংক্ৰমণৰ দিশে আগবঢ়া বুলি প্ৰকাশ কৰি সকলো নাগৰিকক সুৰক্ষাৰ স্বাৰ্থত বিনা কাৰণত ঘৰৰ পৰা নোলাবলৈ আহ্বান জনায় ৷ জিলাখনত বৰ্তমানলৈকে 381 গৰাকী লোক কৰ’ণা ভাইৰাছত আক্ৰান্ত হৈছে ৷ পৰৱৰ্তী সময়ত একাংশ ব্যক্তি সুস্থ হৈ ঘৰলৈ উভটি যোৱাৰ বিপৰীতে বৰ্তমান 51 গৰাকী লোকে চিকিৎসা গ্ৰহণ কৰি আছে ৷
লগতে চাওকঃ ৰহস্যময় অৱস্থাত ইৰানত ভস্মীভূত 7খনকৈ জাহাজ
