কৰিমগঞ্জ, 4 এপ্ৰিল : কৰিমগঞ্জৰ বদৰপুৰত জব্দ বৃহৎ পৰিমাণৰ মাৰণাস্ত্ৰ (Arms and ammunitions recovered in Badarpur) ৷ বদৰপুৰ ৰে’ল ষ্টেচনৰ পৰা ৰে’ল আৰক্ষী(Badarpur Rail police recovered weapons) য়ে জব্দ কৰে চাৰিটা 7.65 পিষ্টল, 8 টা মেগজিন আৰু 15 জাঁই সজীৱ গুলি ৷ এই ঘটনা সন্দৰ্ভত আটক কৰা হৈছে দুজনকৈ লোক ৷
ঘটনাৰ বিৱৰণী অনুসৰি, গুৱাহাটীৰ পৰা আগৰতলা অভিমুখী ৰে’ল নোপোৱাৰ ফলত বদৰপুৰ ৰে’ল ষ্টেচনৰ এখন নিৰ্মীয়মান উৰণীয়া সেঁতুৰ তলত বহি আছিল তিনিজনকৈ লোক ৷ তিনিজনীয়া দলটোক উক্ত স্থানত প্ৰত্যক্ষ কৰে ৰে’ল আৰক্ষীৰ অভিযানকাৰী দলে ৷ দলটোৰ ওপৰত আৰক্ষীৰ সন্দেহ ওপজাত ওচৰলৈ যাওতেই লোক কেইজনে পলায়নৰ চেষ্টা চলায় ৷
ইয়াৰে দুজন লোকক আৰক্ষীয়ে আটক কৰে যদিও এজনে পলায়ন কৰিবলৈ সক্ষম হয় ৷ আটকাধীন লোক দুজন ক্ৰমে সুমন কুমাৰ আৰু বিকাশ কুমাৰ তিৱাৰী বুলি জানিব পৰা গৈছে ৷
দুয়োজন ব্যক্তিৰে ঘৰ বিহাৰৰ শাপলা জিলাত ৷ দলটোৰ লগত থকা বেগৰ পৰা ৰে’ল আৰক্ষীয়ে উদ্ধাৰ কৰে উক্ত মাৰণাস্ত্ৰসমূহ ৷ এই ঘটনাক কেন্দ্ৰ কৰি সমগ্ৰ বদৰপুৰতে সৃষ্টি হৈছে চাঞ্চল্য ৷ সম্প্ৰতি দুয়োজন লোকৰে জেৰা অব্যাহত ৰাখিছে ৰে’ল আৰক্ষীয়ে ৷
লগতে চাওক: নলবাৰীৰ লোহাৰকাঠাত চুৰিকাঘাটৰ ঘটনা
