কেব বিৰোধী প্ৰতিবাদৰ ক'লা ধোঁৱাই ছানিছে অসম

আকাশ ছানি ধৰিছে কলা ধোঁৱাই । প্ৰতিবাদত উত্তাল অসম। নিৰবিছিন্ন ভাৱে চলিছে প্ৰতিবাদ । দৰ্শকৰ ৰূপত থিয় দিছে আৰক্ষী । পৰিৱেশ ক্ৰমান্বয়ে গতি কৰিছে অসম আন্দোলনৰ সময়লৈ । কেবৰ বিৰুদ্ধে নেছুৰ আহ্বানত জনোৱা উত্তৰ পূৰ্বাঞ্চলৰ বন্ধৰ সমৰ্থনত সমগ্ৰ ৰাজ্যত তীব্ৰ প্ৰতিবাদী কাৰ্যসূচী ৷

ধেমাজি,10 ডিচেম্বৰ: কেৱল কলম আৰু কেমেৰাৰে নহয় এইবাৰ দলসংগঠনৰ সৈতে সমজুৱা মুণ্ডণ কৰি প্ৰতিবাদত নামিল সংবাদকৰ্মী ৷ ধেমাজি জিলাৰ বৃহত্তৰ গোগামুখ প্ৰেছ ক্লাবৰ সভাপতি লগতে আন বহু কেইজনে সাংবাদিকে মংগলবাৰে আছু, এই জে ৱাই চি পি, কৃষক মুক্তিকে আদি কৰি ৩০ টা জনগোষ্ঠীয় সংগঠনৰ কেব বিৰোধী প্ৰতিবাদত অংশ লৈ সমজুৱা মুণ্ডণ কৰে ৷

লগতে পঢ়ক '

মৰাণ: নাগৰিকত্ব সংশোধনী বিধেয়ক বাতিলৰ দাবীত সমগ্ৰ অসমৰ সমান্তৰালভাৱে মৰাণতো জাতীয় সংগঠন সমূহে কেব বাতিলৰ দাবীত আন্দোলন তীব্ৰ কৰি তুলিছে । সোমবাৰে চুতীয়া ছাত্ৰ সন্থাই ১২ ঘন্টীয়া নাগৰিকত্ব সংশোধনী বিধেয়ক বাতিলৰ লগতে ছয় জনগোষ্ঠী জনজাতিকৰণৰ দাবীত অসম বন্ধ দিয়াৰ পাছত আজি মঙলবাৰে পুৱা ৫ বজাৰ পৰা ১২ ঘন্টীয়া অসম বন্ধ আহ্বান কৰিছিল উত্তৰ-পূৰ্বাঞ্চল ছাত্ৰ সংগঠনে । মৰাণত এই বন্ধৰ প্ৰভাৱ সৰ্বাত্মক ৰূপ লোৱা পৰিলক্ষিত হয় । ৰাজপথত আন্দোলন তীব্ৰ কৰি তোলাৰ পাছতে আজি মৰাণ আঞ্চলিক ছাত্ৰ সন্থাৰ নেতৃত্ব, মৰাণৰ সকলো জাতি-জনগোষ্ঠীয় সংগঠনৰ প্ৰায় পাঁচ শতাধিক নেতা কৰ্মী একগোট হৈ মৰাণ বিধানসভা সমষ্টিৰ বিধায়ক চক্ৰধৰ গগৈৰ ঘৰ ঘেৰাও কৰে প্ৰতিবাদকাৰি সকলে । প্ৰতিবাদকাৰী সকলে বিধায়ক জনৰ ঘৰ সন্মুখতে কেব বিৰোধী শ্লোগানেৰে পৰিৱেশ উত্তাল কৰি তোলে । লগতে মৰাণৰ সকলো ব্যৱসায়িক প্ৰতিষ্ঠান , যানবাহনৰ চলাচল সম্পূৰ্ণকৈ বন্ধ কৰি দিয়ে প্ৰতিবাদ কাৰিয়ে ।

লগতে পঢ়ক:

গুৱাহাটী: দল-সংগঠন নহয় এইবাৰ নাগৰিকত্ব সংশোধনী বিধেয়কৰ বিৰুদ্ধে ৰাজপথত নামিল সাধাৰণ ৰাইজ । মহানগৰীৰ কাহিলিপাৰাৰ হাজাৰ হাজাৰ লোক ওলাই আহিল নাগৰিকত্ব সংশোধনী বিধেয়কৰ বিৰোধিতা কৰি । গণেশগুৰিত পথৰ ওপৰতে বহি প্ৰতিবাদ কাহিলিপাৰাবাসী ৰাইজৰ । কাহিলিপাৰাবাসী ৰাইজৰ লগতে ছাত্ৰ মুক্তি সংগ্ৰাম সমিতিৰ সদস্য সকলেও এই প্ৰতিবাদী সমদলত অংশগ্ৰহণ কৰি ৰাজপথ উত্তাল কৰি তোলে ।

লগতে পঢ়ক:

যোৰহাট: নেছুৰ আহ্বানত জনোৱা উত্তৰ পূৰ্বাঞ্চলৰ বন্ধৰ সময়ত ৰাজ্যখনৰ বিভিন্ন অঞ্চলৰ লগতে সমগ্ৰ যোৰহাট জিলা খনত সংঘটিত হৈছে ব্যাপক প্ৰতিবাদী কাৰ্যসূচী । পুৱাৰ পৰা প্ৰতিবাদকাৰীয়ে টায়াৰ জ্বলাই সাব্যস্ত কৰে প্ৰতিবাদ । আৰক্ষী আৰু প্ৰশাসনৰ চকুৰ আগতে টায়াৰ জ্বলাই প্ৰতিবাদ সাব্যস্ত কৰিছে যদিও আৰক্ষীয়ে নিৰ্বিকাৰ ভূমিকা গ্ৰহণ কৰাৰ বাদে অন্য বিকল্প নোহোৱা হৈছে । বৰ্তমান সময়তো যোৰহাটত ব্যাপক প্ৰতিবাদী কাৰ্যসূচী ৰূপায়ণ কৰি আছে বিভিন্ন দল সংগঠনে‌ । জিলা উপায়ুক্ত কাৰ্যলয়ৰ সন্মুখত প্ৰতিবাদে তীব্ৰ ৰূপ লোৱাৰ উপৰি জিলা খনৰ বিভিন্ন ঠাইত ৰাষ্ট্ৰীয় ঘাইপথত টায়াৰ জ্বলাই পথ অৱৰোধ কৰিছে প্ৰতিবাদকাৰীয়ে । সকলোৱে মুখত এটাই আৰু শেষ কথা কেব আমি নেমানো ।

ইফালে যোৰহাটৰ মৰিয়নীতো অসম বন্ধৰ প্ৰভাৱ সৰ্বাত্মক । দল সংগঠন নিৰ্বিশেষে সকলো মৰিয়নীবাসী ৰাইজ ৰাজপথলৈ ওলাই আহি 'কেব'ৰ বিৰুদ্ধে প্ৰতিবাদ সাব্যস্ত কৰিছে । বন্ধৰ সমৰ্থকে ঠায়ে-ঠায়ে টায়াৰ জ্বলাই পথ অৱৰোধ কৰাৰ লগতে বিজেপিৰ নেতা দুলেন নায়ক আৰু অসমভাষিক সংখ্যালঘু পৰিষদৰ চেয়াৰমেন বিজেপিৰ অলক ঘোষৰ ঘৰৰ সন্মুখত টায়াৰ জ্বলাই প্ৰতিবাদ সাব্যস্ত কৰে ।