ডিফু, 14 নৱেম্বৰ : অপৰাধমূলক কাৰ্য-কলাপ বৃদ্ধি পাবলৈ ধৰিছে কাৰ্বি আংলং জিলাৰ অসম-নাগালেণ্ড(Assam-Nagaland Border) সীমান্তত ৷ শেহতীয়াকৈ উক্ত অঞ্চলত বৃহৎ পৰিমাণৰ ড্ৰাগছ জব্দ হোৱাৰ পিছত পোহৰলৈ আহিছে বন্যপ্ৰাণীৰ অংগ-প্ৰত্যংগ সৰবৰাহ কৰাৰ ঘটনা ৷ এই ঘটনাই স্বাভাৱিকতে চাঞ্চল্যৰ সৃষ্টি কৰিছে অঞ্চলটোত ৷
প্ৰাপ্ত তথ্য অনুসৰি, দেওবাৰে পুৱা প্ৰায় 9.30 বজাত ডিলাই থানা(Dilai Police)ৰ ভাৰপ্ৰাপ্ত বিষয়া ফণীন্দ্ৰ ৰাভাৰ নেতৃত্বত সহকাৰী উপ পৰিদৰ্শক জিতেন গগৈ আৰু আৰক্ষীৰ এটা দলে এক অভিযান চলায় ৷ উক্ত অভিযানত উদ্ধাৰ হয় দুজন লোকে চোৰাংকৈ অনা দুটাকৈ হাতী দাঁত ৷
হাতী দাঁত সহ আটক কৰা যুৱক দুজন ক্ৰমে হোজাইৰ যমুনামুখৰ এৰাকপিলী গাঁৱৰ নদল কৰ্মকাৰৰ পুত্ৰ মিণ্টু কৰ্মকাৰ আৰু বৰজৰি মাজগাঁও নিবাসী চুলতান আহমেদৰ পুত্ৰ ছাহজাহান আহমেদ বুলি চিনাক্ত কৰা হৈছে ৷ আৰক্ষীয়ে যুৱক দুজনে ব্যৱহাৰ কৰা AS 02 AC 9883 নম্বৰৰ বলেৰ' পিকআপ বাহনখনো জব্দ কৰিছে ৷
লগতে চাওক: বিগত চাৰিবছৰত হ্ৰাস পালে ৰাজ্যৰ লক্ষাধিক কৃষিভূমি
