ডিফু,৭ ডিচেম্বৰ : শেহতীয়াকৈ কাৰ্বি আংলং জিলাত কেইবাটাও ধনদাবীৰ ঘটনা সংঘটিত হৈছে (Extortion case in Karbi Anglong) । জিলাখনৰ কেইবাখনো থানাত ইতিমধ্যে এই সন্দৰ্ভত কেইবাটাও গোচৰ ৰুজু হৈছে । ইয়াৰ পাছতে দুষ্টচক্ৰটোৰ বিৰুদ্ধে সষ্টম হৈছে কাৰ্বি আংলং আৰক্ষী ।
আৰক্ষীয়ে বিভিন্ন স্থানত অভিযান অব্যাহত ৰাখিছে । তাৰ মাজতে কাৰ্বি আংলং জিলাৰ ডিফুত আটক দুই মণিপুৰী লোক । সাধাৰণ নাগৰিকৰ পৰা ধনদাবী কৰাৰ অভিযোগত দুয়োজন লোককে আটক কৰিছে আৰক্ষীয়ে (Manipuri arrested at Diphu on extortion case)।
প্ৰাপ্ত তথ্য মতে, সেনাৰ চোৰাংচোৱাৰ লগতে ডিফু আৰক্ষীয়ে ডিফু থানাৰ অন্তৰ্গত ডি মাৰবেং নামৰ এলেকাত কোনো দুৰ্বৃত্তই স্থানীয় লোকৰ পৰা ধনদাবী কৰাৰ তথ্য লাভ কৰিছিল ৷ উক্ত তথ্যৰ ভিত্তিতে সোমবাৰে বিয়লি ডিফু আৰক্ষী, পঞ্চম বেটেলিয়ানৰ আৰক্ষী আৰু চিআৰপিএফৰ ২০ নং বেটেলিয়ানৰ এক যুটীয়া অভিযানকাৰী দলে অভিযান আৰম্ভ কৰে । অভিযানকাৰী দলটোৱে ডি মাৰবেং গাঁৱৰ পৰা আত্মগোপন কৰি থকা অৱস্থাত মণিপুৰৰ লোক দুজনক আটক কৰিবলৈ সক্ষম হয় ৷
