ডিফু, ৩০ জুন: মিনাৰেল ৱাটাৰৰ উদ্যোগ স্থাপন কৰি নিজৰ লগতে শ শ নিবনুৱাক কৰ্মসংস্থাপন দিয়াৰ প্ৰয়াস কৰিছে কাৰ্বি আংলঙৰ মুন ইংতিপীয়ে । তেওঁ জিলাখনৰ ডিফুৰ ৰংকাংথিৰত "লংচৰ মিনাৰেল ৱাটাৰ" উদ্যোগ স্থাপন কৰাৰ বাবে সিদ্ধান্ত লৈছে । মঙলবাৰে উদ্যোগটোৰ আধাৰশিলা স্থাপন কৰে কাৰ্বি আংলং জিলা স্বায়ত্ব শাসিত পৰিষদৰ মুখ্য কাৰ্যবাহী সদস্য তুলিৰাম ৰংহাঙে ।
মুখ্য কাৰ্যবাহী সদস্যগৰাকীৰ লগত আধাৰশিলা স্থাপন কাৰ্যসূচীত উপস্থিত থাকে বিধায়ক বিদ্যাচিং ইংলেং, দৰচিং ৰংহাং, অমৰচিং তিচ'ৰ লগতে কেইবাগৰাকীও পাৰিষদ ৷ পৰিষদৰ মুখ্য কাৰ্যবাহী সদস্য তুলিৰাম ৰংহাঙে উদ্যোগটোৰ আধাৰশিলা স্থাপন কৰি কয় যে, মুন ইংতিপীৰ প্ৰচেষ্টা এক মহান প্ৰচেষ্টা আৰু ইয়াৰ জৰিয়তে জিলাখনৰ নিবনুৱা যুৱক-যুৱতীসকল উপকৃত হ'ব ৷ কাল কৰ'ণাই সমগ্ৰ দেশ তথা ৰাজ্যৰ ভয়াৱহ পৰিস্থিতিৰ সৃষ্টি কৰাৰ ফলত ঠায়ে ঠায়ে সান্ধ্য জাৰি কৰিবলগীয়া হৈছে ।
ফলত বহু উদ্যোগ বন্ধ হৈ পৰাত লাখ লাখ লোকে কৰ্ম সংস্থাপন হেৰুৱাবলগীয়া হৈছে । আনহাতে, পূৰ্বৰে পৰা এক প্ৰধান সমস্যা হিচাপে দেখা দিয়া নিবনুৱা সমস্যা আছেই ।
মুঠতে এতিয়া দৰিদ্ৰ লোকসকলে হাহাকাৰ কৰিবলগীয়া হৈছে । এনে সময়তে কাৰ্বি আংলঙৰ মুন ইংতিপীৰ পদক্ষেপে জিলাখনৰ নিবনুৱা যুৱক-যুৱতীলৈ আশাৰ বতৰা কঢ়িয়াই আনিছে । উদ্যোগী মহিলাগৰাকীয়ে ডিফু-মাঞ্জা পথ ৭ মাইলৰ ওচৰৰ ৰংকাংথিৰত "লংচৰ মিনাৰেল ৱাটাৰ" উদ্যোগ স্থাপন কৰাৰ বাবে কাম আৰম্ভ কৰিছে ।
সাংবাদিকৰ আগত তেওঁ কয় যে, জিলাখনৰ নিবনুৱা সমস্যাৰ প্ৰতি লক্ষ্য ৰাখিয়েই তেওঁ এই উদ্যোগটো স্থাপন কৰাৰ পৰিকল্পনা কৰিছে । ১২ কোটি টকা ব্যয় সাপেক্ষে ৰংকাংথিৰত ৯ বিঘা মাটিত এই উদ্যোগ স্থাপন কৰা হ'ব ৷ উদ্যোগটো স্থাপনৰ বাবে বেংকৰ পৰা যাৱতীয় ঋণ লোৱাৰ প্ৰক্ৰিয়া আৰম্ভ কৰা হৈছে বুলিও তেওঁ জানিবলৈ দিয়ে ৷ ইফালে, মুন ইংতিপীৰ পদক্ষেপক লৈ আনন্দিত হৈ পৰিছে স্থানীয় লোকসকল ।
