ডিফু, ৮ এপ্রিল: কাৰ্বি আংলঙৰ বকলীয়াঘাটত বৃহস্পতিবাৰে দুপৰীয়া এক দুৰ্ঘটনা সংঘটিত হয় । জানিব পৰা মতে, দিনৰ প্রায় ১ বজাত ডিফুৰ দিশৰ পৰা তীব্র বেগেৰে আহি থকা এএছ-০৯-এফ-৮৮৭৪ নম্বৰৰ ডাষ্টাৰ বাহনখনে বকলীয়াঘাট প্রাথমিক স্বাস্থ্যকেন্দ্ৰৰ সমীপত ৩৬ নং ৰাষ্ট্রীয় ঘাইপথৰ দাঁতিত স্বাস্থ্য বিভাগৰ চাইনব'ৰ্ড সংলগ্ন হৈ থকা এটা খুঁটা মহতিয়াই নিয়ে ।
ইয়াৰ পিছত বাহনখনে পথৰ দাঁতিত থকা এজোপা নিম গছত প্ৰচণ্ড জোৰেৰে খুন্দিয়ায় । বাহনখনৰ খুন্দাত গছজোপা গুৰিৰে সৈতে উভালি পৰাৰ লগতে ইয়াৰ আধা অংশ ছিঙি প্রায় পােন্ধৰ ফুট দূৰত ছিটিকি পৰে । বাহনখনে নিয়ন্ত্ৰণ হেৰুৱাই অন্য এজোপা গছতাে খুন্দিয়ায় ।
দুর্ঘটনাত বাহনখনত থকা দুগৰাকী ব্যক্তি সামান্য পৰিমাণে আহত হয় । আহত ব্যক্তি দুজন ক্ৰমে সত্যনাথ বসুমতাৰী আৰু লখিমাই বসুমতাৰী বুলি জানিব পৰা গৈছে । আনহাতে, দুৰ্ঘটনাগ্ৰস্ত বাহনখনৰ সন্মুখৰ অংশ যথেষ্ট ক্ষতিসাধন হয় ।
লগতে পঢ়ক:কামপুৰ ৰাস পথাৰত বহাগী মেলাৰ আয়োজন
