ডিফু, 4 অক্টোবৰ : ডিফুৰ ছেমছনছিং ইংতি মেম'ৰিয়েল পাৰ্কৰ সন্মুখত চিপিআই (এমএল) কে ধৰি কেইবাটাও সংঘটনে ধৰ্ণা কাৰ্যসূচী ৰূপায়ণ কৰাৰ লগতে উত্তাল প্ৰতিবাদ সাব্যস্ত কৰে ৷ জম্মু-কাশ্মীৰত প্ৰযোজ্য সংবিধানৰ 370 অনুচ্ছেদ বাতিলকৰণৰ বিৰোধিতা, অত্যাৱশ্যকীয় সামগ্ৰীৰ মূল্যবৃদ্ধি আৰু কাৰ্বি আংলং আৰু ডিমা হাছাওকে সাঙুৰি এখন স্বায়ত্ত ৰাজ্য গঠনৰ দাবীত এনেদৰে প্ৰতিবাদ সাব্যস্ত কৰে ৷ পাহাৰীয়া জিলাখনৰ আগশাৰীৰৰ চিপিআই (এমএল) নেতা ৰবি কুমাৰ ফাংচ'ই প্ৰতিবাদী কাৰ্যসূচীত অংশগ্ৰহণ কৰি সাংবাদিকৰ মন্তব্য কৰে যে, মোদী নেতৃত্বাধীন বিজেপি চৰকাৰ দ্বিতীয়বাৰৰ বাবে ক্ষমতালৈ আহিয়েই 370 অনুচ্ছেদ বাতিল কৰি জম্মু-কাশ্মীৰৰ জনসাধাৰণক হেঁচা প্ৰয়োগ কৰাৰ লগতে ইণ্টাৰনেট সেৱা বন্ধ কৰিছে আৰু পণবন্দী কৰি ৰাখিছে ৷ চৰকাৰৰ নীতিৰ প্ৰতিবাদ কৰিব বিচৰাসকলক কাৰাগাৰলৈ প্ৰেৰণ কৰাৰ লগতে সৰু সৰু ল'ৰাকো কাৰাৰুদ্ধ কৰা হৈছে বুলি নেতাগৰাকীয়ে অভিযোগ উত্থাপন কৰে ৷ অতি অমানৱীয়ভাৱে এই লোকসকলক চৰকাৰে হাৰাশাস্তি কৰাৰ বাবে ক্ষোভ উজাৰে ৰবি কুমাৰে ৷
এনে অৱস্থাত যোৱা দুটা মাহে কাশ্মীৰত স্বাভাৱিক অৱস্থা ঘূৰাই অনাৰ বিপৰীতে মৌলিক অধিকাৰ খৰ্ব কৰা হৈছে বুলি আক্ষেপ প্ৰকাশ কৰে বামপন্থী নেতাগৰাকীয়ে ৷ ৰবি কুমাৰ ফাংচ'ৱে লগতে কয় যে, অত্যাৱশ্যকীয় সামগ্ৰীৰ গগণচুম্বী মূল্যবৃদ্ধিৰ বাবে জনসাধাৰণে চৰম অস্বস্তি ভোগ কৰিছে ৷ আনহাতে, কাৰ্বি আংলং আৰু ডিমা হাচাওৰ ৰাইজে ভোগ কৰি অহা ষষ্ঠ অনুসূচীৰ 244 (ক) ৰ ক্ষমতা সমূহো এপদ-দুপদকৈ কাঢ়ি নিছে বুলি অভিযোগ কৰে তেওঁ ৷ এই সম্পৰ্কত ৰবি কুমাৰে কয় যে, জম্মু -কাশ্মীৰৰ পৰা অনুচ্ছেদ 370 বাতিল কৰাৰ আৰ্হিৰে পাহাৰীয়া জিলা দুখনৰ ষষ্ঠ অনুসূচীৰ 244(ক) ৰ সুবিধা কাঢ়ি নিব পাৰে বুলি পাহাৰীয়া জিলা দুখনৰ ৰাইজ শংকিত হৈ পৰিছে ৷ এই প্ৰতিবাদী কাৰ্যসূচীত অংশগ্ৰহণ কৰে এইছএছডিচি, কেএছএ, কেএনচিএ, আৰৱাইএ, আইছা, আইপোৱা, এছৱাইজে, এছৱাইচি, কানকিচ, নিৰ্মাণ শ্ৰমিক এআইচিটিও আদি সংগঠনে ৷
