১ ছেপ্তম্বৰৰ শ্ৰেণী বৰ্জনৰ হুংকাৰ কাৰ্বি আংলং জিলা প্ৰাথমিক শিক্ষক সন্থাৰ

বিগত চাৰিমাহে দৰমহাৰ পৰা বঞ্চিত কাৰ্বি আংলং জিলা প্ৰাথমিক শিক্ষক সন্থাই অহা ১ ছেপ্তম্বৰৰ পূৰ্বে দৰমহা লাভ নকৰিলে ১ ছেপ্তম্বৰৰ পৰা ৫ ছেপ্তম্বৰলৈ শ্ৰেণী বৰ্জন আন্দোলনৰ কাৰ্যসূচী লোৱাৰ সিদ্ধান্ত গ্ৰহণ কৰিছে ৷

কাৰ্বি আলং, 17 আগষ্ট : বিগত চাৰিমাহৰ পৰা দৰমহাৰ পৰা বঞ্চিত কাৰ্বি আংলং জিলা প্ৰাথমিক শিক্ষক সন্থাই চমুকৈ কাপটাই আন্দোলনৰ কাৰ্যসূচী গ্ৰহণ কৰিছে ৷ শণিবাৰে কাৰ্বি আংলং জিলা প্ৰাথমিক শিক্ষক সন্থাৰ কাৰ্যনিৰ্বাহকৰ যুটীয়া বৰ্ধিত সভাত বিষয়টোৰ ওপৰত বিস্তৃত আলোচনা হোৱাৰ পিছত অহা ১ ছেপ্তম্বৰৰ পূৰ্বে দৰমহা লাভ নকৰিলে শ্ৰেণী বৰ্জন আন্দোলনৰ কাৰ্যসূচী গ্ৰহণ কৰাৰ সিদ্ধান্ত গ্ৰহণ কৰে ৷ কাৰ্বি আংলং প্ৰাথমিক শিক্ষক সন্থা চমূকৈ কাপটাৰ সভানেত্ৰী লাংটুপী ৰংপিপী আৰু সম্পাদক প্ৰবীন হাঞ্চেই শণিবাৰে এক সংবাদমেল যোগে আন্দোলনৰ সিদ্ধান্তৰ কথা সদৰি কৰে ৷ সম্পাদক হাঞ্চেই সংবাদ মাধ্যমৰ আগত ক্ষোভ উজাৰি কয় যে অসম চৰকাৰ আৰু কাৰ্বি আংলং স্বায়ত্ত শাসিত পৰিষদে কৰ্মচাৰী সকলৰ দৰমহাৰ বিষয়টো বিবেচনা কৰা উচিত ৷ অনলাইন দৰমহা লোৱাত আপত্তি নাই যদিও আজিকোপতি চৰকাৰে জিলা প্ৰাথমিক শিক্ষা বিষয়াৰ ডিডিঅ' কোড আৰু পাছৱৰ্ড প্ৰদান কৰা নাই ৷ কাৰ্বি আংলং স্বায়ত্ত শাসিত পৰিষদে সঞ্জয় হাঞ্চে নামৰ বিষয়া গৰাকীক দায়িত্ব দিছে যদিও বিষয়া গৰাকীৰ গাফিলতিৰ বাবে বিষয়টো আগবঢ়া নাই ৷ সভানেত্ৰী লাংটুপী ৰংহাঙপীয়ে কয় যে আমাৰ অৱস্থা মুখ্যমন্ত্ৰী তথা বিত্তমন্ত্ৰী লগতে কাৰবি আলং স্বায়ত্ত শাসিত পৰিষদৰ মুখ্য কাৰ্যবাহী সদস্য গৰাকীয়ে উপলব্ধি কৰা উচিত ৷ অন্যথা অহা ১ ছেপ্তম্বৰৰ পৰা ৫ ছেপ্তম্বৰলৈ শ্ৰেণী বৰ্জন কৰিবলৈ বাধ্য হোৱাৰ লগতে শিক্ষক দিৱসৰ কাৰ্যসূচী বৰ্জন কৰিব ৷