ডিফু, ১৯ মার্চ: বিগত কেইটামান বছৰত আন্তঃৰাজ্যিক গাড়ী চোৰ চক্রৰ বিৰুদ্ধে শক্তিশালী পদক্ষেপ গ্ৰহণ কৰিবলৈ সক্ষম হৈছে কাৰ্বি আংলং আৰক্ষী । জিলাখনৰ আৰক্ষীৰ এনে সাহসী কাৰ্যক উৎসাহিত কৰাৰ বাবে শুক্ৰবাৰে এইছ ডি এফ চি ই আৰ জি অ' জেনেৰেল ইঞ্চুৰেঞ্চ কৰ্পৰেছন লিমিটেডে কেইবাগৰাকীও আৰক্ষী বিষয়াক সম্বৰ্ধনা জ্ঞাপন কৰে ।
উল্লেখ্য যে, কার্বি আংলঙৰ মাজেৰে পাৰ হৈ যােৱা উত্তৰ-পূৱ সংযােগী ৰাষ্ট্রীয় ঘাইপথেৰে আন্তঃৰাজ্যিক গাড়ী চোৰ চক্রই দেশৰ বিভিন্ন প্রান্তৰ পৰা চুৰি কৰি অনা বাহনসমুহ সৰবৰাহ কৰি আহিছিল ।
কিন্তু শেহতীয়াকৈ কাৰ্বি আংলং আৰক্ষীয়ে সঘনাই অভিযান চলাই গাড়ী চুৰি ঘটনা হ্ৰাস কৰাত সফল হৈছে ।
আৰক্ষীৰ এনে অভিযানত বহু লাখটকীয়া বিলাসী বাহনকে ধৰি বহু সংখ্যক চুৰি বাহন জব্দ হৈছে । লগতে গাড়ী চুৰিৰ সৈতে জড়িত বহু লোককো আৰক্ষীয়ে হাতে-লোটে জালত পেলাবলৈ সক্ষম হৈছে ।
বিগত সময়ছােৱাত চুৰি বাহন উদ্ধাৰ কৰি গাড়ী চোৰ চক্রৰ বিৰুদ্ধে একপ্রকাৰ ত্ৰাসৰ সৃষ্টি কৰা কার্বি আংলং জিলা আৰক্ষীৰ কেইবাগৰাকীও বিষয়াক শুক্ৰবাৰে সম্বর্ধনা জনায় এইছ ডি এফ চি ই আৰ জি অ' জেনেৰেল ইঞ্চুৰেঞ্চ কৰ্পৰেছন লিমিটেডৰ উপাধ্যক্ষ জীৱন বাটছাই ।
কাৰ্বি আংলং জিলা আৰক্ষী অধীক্ষক দেৱজিৎ দেউৰী, উপ-আৰক্ষী অধীক্ষক নাহিদ কৰিশ্মা, মাঞ্জা থানাৰ ভাৰপ্রাপ্ত বিষয়া জিতুমণি ডেকাক সম্বর্ধনা জ্ঞাপন কৰা হয় । এই অনুষ্ঠানত অসম আৰক্ষীৰ চেন্ট্রেল ৰেঞ্জৰ ডি আই জি সত্যজ হাজৰিকাকো জিলা আৰক্ষী অধীক্ষকৰ জৰিয়তে সম্বৰ্ধনা জনোৱা হয় ৷
লগতে পঢ়ক:লাহৰীঘাটত নিৰ্বাচনলৈ কেনেদৰে আগবাঢ়িছে বিজেপিৰ প্ৰাৰ্থী কিদাৰু জামান জিন্না
