ডিফু, 6 আগষ্ট: পাহাৰীয়া জিলা কাৰ্বি আংলঙৰ সদৰ চহৰ ডিফুক মহানগৰলৈ ৰূপান্তৰিত কৰাৰ অহৰহ প্ৰচেষ্টা অব্যাহত ৰাখিছে কাৰ্বি স্বায়ত্ত শাসিত পৰিষদৰ মুখ্য কাৰ্যবাহী তুলিৰাম ৰংহাঙে ৷ সোমবাৰে পুৱাৰ ভাগত মুখ্য কাৰ্যবাহী সদস্য গৰাকীয়ে টীম কাৰ্বি আংলঙক লগতলৈ ব্যয় বহুল একাধিক আঁচনিৰ আধাৰশিলা স্থাপন কৰাৰ লগতে নিৰ্মাণ কাৰ্যস্থলীত ভূমি পূজন সম্পন্ন কৰে পৰম্পৰাগত কাৰ্বি নিয়মেৰে ৷
ৰাজ্য চৰকাৰৰ বিত্তীয় আয়োগ আৰু কেন্দ্ৰীয় চৰকাৰৰ হাডকো পৰিকল্পনাৰ জৰিয়তে আবণ্টিত পুঁজিৰে ডিফুৰ ৰংখেলানত, ২২ কোটি টকা ব্যয় সাপেক্ষে শ্বপিং কমপ্লেক্স, ডিফুৰ ছেৰিকালচাৰ চৌহদত ৮ কোটি ৫০ লাখ টকা ব্যয় সাপেক্ষে মাল্টি ষ্ট'ৰ পাৰ্কিং, ডিফুৰ মাটিপুঙত প্ৰথম বাৰৰ বাবে জিলাখনৰ ভিতৰত ৪৪ কোটি টকা ব্যয় সাপেক্ষে অত্যাধুনিক আৰ্হিৰ কাৰ্বি অতিথি শালা, আৰু ৭ কোটি ৮০ লাখ টকা ব্যয় সাপেক্ষে টাউন হ'ল নিৰ্মাণৰ আধাৰশিলা স্থাপন কৰাৰ লগতে ভূমি পূজন সম্পন্ন কৰে মুখ্য কাৰ্যবাহী সদস্য গৰাকীয়ে ৷ আনহাতে, সাংবাদিকৰ সৈতে হোৱা সাক্ষাৎকাৰত মুখ্য কাৰ্যবাহী সদস্য তুলিৰাম ৰংহাঙে কয় যে, উক্ত প্ৰকল্প সমূহ এবছৰৰ ভিতৰত নিমাৰ্ণ কাৰ্য্য সম্পূৰ্ণ কৰিবলৈ চুক্তি কৰা হ'ব ঠিকাদাৰৰ সৈতে ৷ চহৰখনক নিশাৰ ভাগত উজলাই তুলিবলৈ শীঘ্ৰে ২০ টাকৈ উচ্চ ক্ষমতা সম্পন্ন হাইমেক্স পাৱাৰ লাইট স্থাপন কৰাৰ লগতে চহৰখনৰ ১৪ টা ৱাৰ্ডত ৫০০ টা ষ্ট্ৰীট সৌৰ চাকি স্থাপন কৰা হব বুলিও জানিবলৈ দিয়ে পৰিষদৰ মুখ্য কাৰ্যবাহী সদস্য গৰাকীয়ে ৷
মুখ্য কাৰ্যবাহী সদস্য গৰাকীয়ে অনাগত দিনত চিটি ইনফ্ৰাষ্ট্ৰাকচাৰ ডেভেলপমেণ্ট ফাণ্ডৰ জৰিয়তে চহৰখনত আন্ত:ৰাজ্যিক বাছ টাৰ্মিনেল, ডিফু হৰিজন কলনিত ট্ৰাক পাৰ্কিং, নিউ মাৰ্কেট কমপ্লেক্স, কমাৰ্চ কমপ্লেক্স, প্ৰতিটো ৱাৰ্ডত উপযুক্ত ড্ৰেইনেজ পদ্ধতি আৰু পেভাৰ্ট ব্লকেৰে পথ নিৰ্মাণ আৰু ধৰমনালাত নদী বান্ধ আদি নিৰ্মাণৰ কথাও ভাষণ প্ৰসংগত উল্লেখ কৰাৰ লগতে পাহাৰীয়া জিলাখনত বন্ধ সংস্কৃতি পৰিহাৰ কৰি কৰ্ম সংস্কৃতি, ক্ৰীড়া সংস্কতি আদিক আকোঁৱালি লবলৈ আহ্বান জনায় ৷
