ডিফু, ১ অক্টোবৰ : অসম-নাগালেণ্ড সীমান্তত শুকুৰবাৰে কাৰ্বি আংলং আৰক্ষী আৰু আছাম ৰাইফলছে এক যুটীয়া অভিযান চলাই বৃহৎ সংখ্যক মৰণাস্ত্ৰ উদ্ধাৰ কৰিবলৈ সক্ষম হয় ৷ আৰক্ষী সূত্ৰই জানিবলৈ দিয়া অনুসৰি, মাৰণাস্ত্ৰ সহ কেইগৰাকীমান লোক অসম-নাগালেণ্ড সীমান্তৰে অসমৰ দিশে আহি থকাৰ তথ্য লাভ কৰিছিল কাৰ্বি আংলং আৰক্ষীয়ে ৷ ইয়াৰ পাচতে নাকা তালাচী আৰম্ভ কৰে আৰক্ষীয়ে ৷
কাৰ্বি আংলং জিলাৰ উপ আৰক্ষী অধীক্ষক নাহিদ কৰিশ্মাৰ নেতৃত্বত আৰক্ষীৰ এটা দলে চলাইছিল এই নাকা তালাচী ৷ এই নাকা তালাচীৰ জৰিয়তে বোকাজান থানাৰ অধীনৰ নাহৰজানৰ ছোটলেংৰীত এখন নম্বৰ প্লেট বিহীন এখন বাহন জব্দ কৰে ৷ উক্ত বাহনখনৰ পৰাই তিনিটা ৫৬ ৰাইফল, এটা পিষ্টল, মেগজিন, বহু সংখ্যক সজীৱ গুলী, মবাইল ফোন আদি জব্দ কৰিবলৈ সক্ষম হয় ৷
ইয়াৰ লগতে নাংপৈ ভাচিম আচহাঙ চিথুং, টাৰটাৰ লাংচুংৰেই কামেই, খুইকাচহাঙ থাংকুল আৰু জিংখি ৱংজিৰিংগাম নামৰ চাৰিজন লোকক আটক কৰে ৷ বৰ্তমান আটকাধীন লোক কেইজনক জেৰা অব্যাহত ৰাখিছে কাৰ্বি আংলং আৰক্ষীয়ে ৷
লগতে পঢ়ক: শ্বেৰমান আলি বিজেপিৰ এজেন্ট : অখিল গগৈ
