ডিফু, 19 এপ্ৰিল : সাত বিহুৰ মাজতে অসম আৰক্ষীয়ে ফুটালে গুলী ৷ এইবাৰ অসম আৰক্ষী বন্দুক গৰজিল অসম-নাগালেণ্ড সীমান্তৰ অঞ্চল খটখটিত ৷ আৰক্ষীৰ বেহু ফালি পলায়নৰ চেষ্টা কৰোতেই খটখটি আৰক্ষীয়ে গুলীয়াবলৈ বাধ্য হয় এটা ড্ৰাগছ সৰবৰাহকাৰীক (Police encounter at Khotkhoti) ৷ আৰক্ষীৰ গুলীত আহত হয় ড্ৰাগছ সৰবৰাহকাৰী নুৰ উদ্দিন ৷
ঘটনাৰ বিৱৰণী অনুসৰি, বোকাজান মহকুমাৰ খটখটি থানাৰ সমীপৱৰ্তী এলেকাত সংঘটিত হৈছে এই ঘটনা (Firing incident at Khotkhoti) ৷ খটখটি আৰক্ষীয়ে সোমবাৰে নিশা 100 গ্ৰাম ড্ৰাগছসহ আটক কৰে দুটা সৰবৰাহকাৰীক ৷ অভিযুক্ত নুৰ উদ্দিনৰ স্বীকাৰোক্তিৰ ভিত্তিত মঙলবাৰে আৰক্ষীয়ে তদন্তৰ খাতিৰত ডিমাপুৰত থকা নুৰ উদ্দিনৰ আন সহযোগীক ধৰিবলৈ গৈ আছিল ৷
আৰক্ষীৰ এক বিশেষ সূত্ৰই সদৰি কৰা অনুসৰি, ডিমাপুৰলৈ গৈ থকা অৱস্থাতে নুৰ উদ্দিনে 39 নং ৰাষ্ট্ৰীয় ঘাইপথৰ কাষতে আৰক্ষীৰ বেহু ফালি হাবিৰ ফালে পলায়নৰ চেষ্টা কৰে ৷ তাৰ পাচত আৰক্ষীয়ে বাৰম্বাৰ ড্ৰাগছ সৰবৰাহকাৰীটোক ৰখাৰ নিৰ্দেশ দিয়ে ৷ কিন্তু আৰক্ষীৰ কথা অমান্য কৰি হাবিৰ মাজলৈহে পলায়নৰ চেষ্টা কৰে সৰবৰাহকাৰীটোৱে ৷
উপায়ন্তৰ হৈ তেনে সময়তে আৰক্ষীয়ে নুৰ উদ্দিনৰ ভৰিলৈ লক্ষ্য কৰি গুলী কৰিবলৈ বাধ্য হয় ৷ ফলত আৰক্ষীৰ গুলীত আহত হয় ড্ৰাগছ সৰবৰাহকাৰীটো ৷ বৰ্তমান ডিফু মেডিকেল কলেজ হাস্পতালত চিকিৎসাধীন হৈ আছে আহত নুৰ উদ্দিন(Drugs paddler injured in police encounter) ৷
লগতে পঢ়ক : ৰাক্ষসিনীত আৰক্ষীৰ গুলীত আহত দুৰ্ধৰ্ষ অপৰাধী
