ডিফু, 5 আগষ্ট: 2 আগষ্টৰ নিশা কাৰ্বি আংলং জিলাৰ ডিফুৰ ৫ কিলোস্থিত জিলা কাৰাগাৰৰ পৰা পলায়ন কৰিছিল তিনিটাকৈ কাৰাবন্দী (Prisoners escape from Diphu jail) ৷ কাৰাগাৰ চৌহদৰ পৰা কাৰাবন্দী পলায়ন কৰা এই ঘটনাৰ পাছতে জিলাখনত তীব্ৰ চাঞ্চল্যৰ সৃষ্টি হৈছে । ইফালে পলাতক তিনি কাৰাবন্দীৰ সন্ধানত জিলাখনৰ আৰক্ষীয়ে বিভিন্ন স্থানত আৰম্ভ কৰিছে অভিযান ৷ বিশেষ চোৰাংচোৱা নিয়োগ কৰি চলোৱা এই অভিযানত আৰক্ষীয়ে এটা কাৰাবন্দীক আটক কৰিবলৈ সক্ষম হৈছে (Diphu jail escaped prisoner arrested) ৷
আইনুল আলী নামৰ পলাতক কাৰাবন্দীটোক বৃহস্পতিবাৰে ডিফু আৰক্ষীয়ে আটক কৰিছে যদিও বৰ্তমানেও পলাতক হৈ আছে আন দুটা কাৰাবন্দী ৷ ডিফু থানাৰ ভাৰপ্ৰাপ্ত বিষয়া জেএছ খবুঙৰ নেতৃত্বত আৰক্ষীৰ এটা দলে ডিমাপুৰৰ পদুম পুখুৰী অঞ্চলৰ পৰা অভিযান চলাই আটক কৰিছে আইনুল নামৰ পলাতক কাৰাবন্দীটোক ৷ আনহাতে পলাতক হৈ থকা আন দুটা কাৰাবন্দীৰ সন্ধানত আৰক্ষীয়ে বৰ্তমানেও অব্যাহত ৰাখিছে অভিযান ৷
