বকো, 30 মে’: প্ৰকৃতিয়ে সলাইছে নিজা ৰূপ ৷ তাৰ মাজতেই বকোৰ বাঘৰগাঁৱৰ পৰিয়াল এটালৈ আহিছে শ শ আলহী । এই আলহীবিধ হৈছে সকলোৰে পৰিচিত টোকোৰা চৰাই ।
ব’হাগৰ বৰদৈচিলাৰ সৈতে আহি এই টোকোৰা চৰাই বিধে দি যায় প্ৰকৃতিক এক অনুপম সৌন্দৰ্য্য । শান্তি প্ৰিয় লোকৰ গৃহৰ চৌহদৰ তামোল, নাৰিকল আদি ওখ গছত আশ্ৰয় লৈ সাজি লয় বাহ । কাৰণ টোকোৰা চৰাইৰ এয়া বংশ বৃদ্ধিৰ সময় ।
প্ৰায় ৫/৬ মাহ বসবাস কৰি পোৱালি ডাঙৰ দীঘল কৰি গুচি যায় দূৰ দিগন্তলৈ । বহু পৰিয়ালৰ বিশ্বাস টোকোৰা চৰাই বিধে আহি গৃহত বাহ সাজিলে গৃহস্থলৈ আহে সুখ-শান্তি । যেন টোকোৰা চৰাই সোভাগ্যৰ প্ৰতীক। প্ৰায় বিশ বছৰ ধৰি বকোৰ এই পৰিয়ালটোলৈ ক্ৰমাগতভাৱে আহিয়েই আছে আলহী ।
টোকোৰা চৰাইৰ বাহ সজা দৃশ্য নান্দনিক । এডাল এডাল খেৰ-কূটা গোতাই আপোনমনে বাহ সাজে টোকোৰাই । সৰু জোঙা ঠোঁটেৰে আটোমটোকাৰিকৈ বাহ সজা দৃশ্যই প্ৰভাম্বিত কৰে প্ৰকৃতিপ্ৰেমীক ।
ব’হাগত আহি শাওন-ভাদত বিদায় লয় টোকোৰা চৰাই বিধে । ক’ৰবাৰ পৰা উৰি আহি দি থৈ যায় কৰ্মপ্ৰেৰণাৰ সংজ্ঞা ।
লগতে পঢ়ক: বিলুপ্তিৰ পথত অভিযন্তা চৰাই
