ছয়গাঁও, 4 আগষ্ট : অৱশেষত সোমবাৰে নিশা আৰক্ষীৰ জালত পৰিল বগা আৰু টেকেলি । চুৰি ডকাইটিকে ধৰি বিভিন্ন অপৰাধজনিত কাৰ্য্যৰে জড়িত এই দুই অপৰাধী অৱশেষত পৰিল আৰক্ষীৰ ৷
দক্ষিণ কামৰূপৰ বিজয়নগৰত দিন দুপৰতে ব্যৱসায়ীক গুলীয়াই হত্যাৰ চেষ্টা চলোৱা এই দুই কুখ্যাত অপৰাধীক অৱশেষত কৰায়ত্ব কৰিবলৈ সক্ষম হ’ল বিজয়নগৰ আৰক্ষী (Bijayanagar Police) । অভিযোগ অনুসৰি, একাধিক চুৰি, ডকাইত আৰু হত্যাৰ গোচৰত অভিযুক্ত হৈ আছিল আনোৱাৰ হুছেইন ওৰফে বগা আৰু তফিকুল আলি ওৰফে টেকেলি ।
দক্ষিণ কামৰূপৰ বাণিজ্যিক কেন্দ্ৰস্বৰূপ বিজয়নগৰত দেওবাৰে দিন দুপৰতেই এগৰাকী ব্যৱসায়ীক পিষ্টল দেখুৱাই হত্যাৰ চেষ্টা চলাইছিল আটকাধীন দুই অপৰাধীয়ে । ঘটনাৰ বিৱৰণি অনুসৰি, 1 আগষ্টৰ দুপৰীয়া নম্বৰ প্লেট বিহীন পালচাৰ মটৰ চাইকেলেৰে আহি দুই ডকাইতে হেলমেট পিন্ধি প্ৰৱেশ কৰে অসম ষ্ট’ৰ নামৰ দোকানখনত ৷ তাৰ পাচতে দোকানৰ স্বত্বাধিকাৰী পৱন কুমাৰ আগৰৱালক আক্ৰমণ কৰে এই দুই দুৰ্বৃত্তই।
লগতে পঢ়ক: 60 দশকৰ পৰম্পৰা ধৰি ৰাখিছে চোৰে...
প্ৰাপ্ত তথ্য অনুসৰি, দোকানৰ স্বতাধিকাৰী পৱন কুমাৰ আগৰৱালক গুলীয়াবলৈয়ো উদ্যত হৈছিল এই দুই কুখ্যাত ডকাইতে ৷ আনকি আত্মৰক্ষাৰ বাবে চিঞয়-বাখৰ কৰাত হেলমেটেৰে প্ৰহাৰ কৰিছিল পৱন কুমাৰ আগৰৱালক ৷
ইয়াৰ ফলত গুৰুতৰভাৱে আহত হয় পৱন কুমাৰ আগৰৱাল ৷ পৰৱৰ্তী সময়ত ব্যৱসায়ী পৱন কুমাৰ আগৰৱালৰ চিঞৰ-বাখৰ শুনি সেই স্থানত উপস্থিত হয় অঞ্চলটোৰ ৰাইজ ৷ উদ্ধাৰ কৰিবলৈ সক্ষম হয় পৱন কুমাৰ আগৰৱালক ৷ ইফালে পৰিস্থিতি বিষম দেখি মটৰ চাইকেল এৰি সেই স্থানৰ পৰা পলায়ন কৰে দুই ডকাইতে ৷ ইফালে এই সমগ্ৰ ঘটনা বন্দী হয় চিচিটিভি কেমেৰাত ৷
লগতে পঢ়ক: দেওৰেকৰ দাৰ আঘাতত প্ৰাণ গ’ল বৌয়েকৰ
পৰৱৰ্তী সময়ত ঘটনাস্থলীত উপস্থিত হয় আৰক্ষী ৷ আৰক্ষীয়ে ঘটনাস্থলীৰ পৰা জব্দ কৰে দুই আক্ৰমণকাৰীয়ে ব্যৱহাৰ কৰা মটৰ চাইকেল দুখন আৰু এটা বেগ ৷ এই ঘটনাক কেন্দ্ৰ কৰি অঞ্চলটোত বিৰাজ কৰে তীব্ৰ চাঞ্চল্যই ৷ আৰক্ষীয়ে গোপন সূত্ৰৰ ভিত্তিত চলোৱা এক অভিযানত সোমবাৰে নিশা ঘটনাৰ লগত জড়িত বিজয়নগৰ হালীগাঁৱৰ তফিকুল আলি ওৰফে টেকেলিক ঘৰৰ পৰা আৰু আনোৱাৰ হুছেইন ওৰফে বগাক বকোৰ সোণতলীৰ পৰা কৰায়ত্ব কৰিবলৈ সক্ষম হয় ।
ইয়াৰে বগা নামৰ ডকাইতটোৰ পৰা নটা সজিব গুলীসহ এটা জাপানত নিৰ্মিত পিষ্টলো উদ্ধাৰ কৰে । উল্লেখ্য যে, এই বিজয়নগৰতেই প্ৰায় দুবছৰ পূৰ্বে শান্তিলাল জৈন নামৰ এগৰাকী ব্যৱসায়ীক আটকাধীন এই বগাই গুলীয়াই হত্যা কৰিছিল । জানিব পৰা মতে, একাধিক গাড়ী চুৰি আৰু হত্যাৰ গোচৰত অভিযুক্ত কুখ্যাৎ অপৰাধী বগাৰ সমগ্ৰ উত্তৰ পূৰ্বাঞ্চলতেই আছে এক কলা সাম্ৰাজ্য ৷
লগতে পঢ়ক: চিৰাঙত বন বিভাগৰ জালত চোৰাং চিকাৰী
