কৰ্মসংস্থাপন বিচাৰি মুম্বাইলৈ যোৱা হাজোৰ দ্বীপজ্যোতি দাসৰ আজিও সন্ধান নাই

চাকৰি দিয়াৰ প্ৰলোভনেৰে ধুবুৰীৰ গোলোকগঞ্জৰ ৰহমত আলীয়ে লৈ গৈছিল মুম্বাইলৈ ৷ ৰে'লেৰে গৈ 18 জুনত যুৱকজন মুম্বাইত উপস্থিত হয় আৰু ঘৰলৈ ফোন কৰি বিপদত পৰাৰ কথা জনায় ৷

হাজো, 22 জুনঃ বহিৰাজ্যত কৰ্মসংস্থাপন বিচাৰি গৈ সন্ধানহীন হাজোৰ এজন যুৱক ৷ সন্ধানহীন হোৱা যুৱকজনৰ নাম দ্বীপজ্যোতি দাস ৷ যোৱা 15 জুনত হাজোৰ পৰা যুৱক জনক চাকৰি দিয়াৰ প্ৰলোভনেৰে এসময়ত কৰ্মসূত্ৰে চিনাকী হোৱা ধুবুৰী গোলোকগঞ্জৰ ৰহমত আলীয়ে লৈ গৈছিল মুম্বাইলৈ ৷ ৰে'লেৰে গৈ 18 জুনত যুৱকজন মুম্বাইত গৈ উপস্থিত হয় আৰু তাৰ পিচতে ঘৰলৈ ফোন কৰি বিপদত পৰাৰ কথা জনায় ৷ ফোনযোগে পৰিয়ালৰ লোকক "মই মৰি গ'লে মোক ৰহমতে শেষ কৰিব আৰু বচালেও ৰহমতেই মোক বচাব পাৰিব" বুলি জানিবলৈ দিয়ে ৷

সেই ফোন কলৰ পিছত আজিলৈ কোনো খবৰ নাই দ্বীপজ্যোতি দাসৰ, বন্ধ হৈ আছে মোবাইল ফোন । ইফালে যোগাযোগ কৰিব পৰা নাই ৰহমত আলীৰ সৈতেও ৷ এই ৰহস্যজনক ফোন কলৰ পিছতে ঘটনা সন্দৰ্ভত পৰিয়ালৰ লোকে হাজো আৰক্ষী থানাত দাখিল কৰিছে এজাহাৰ ৷

লগতে পঢ়কঃ ভুৱা পৰিচয়েৰে যুৱতীক প্ৰেমৰ জালত পেলাই ৰঙাঘৰৰ আলহী হ'ল এজন

এতিয়া স্থানীয় ৰাইজ আৰু পৰিয়ালৰ প্ৰশ্ন মানৱ দেহ অংগৰ ব্যৱসায়ীৰ ওচৰত বিক্ৰী কৰিলে নেকি দ্বীপজ্যোতিক ? ৰহমত আলীয়ে ক`ত লৈ গল যুৱকজনক? এই সকলোবোৰৰ উত্তৰ পোহৰলৈ আহিব আৰক্ষীৰ সঠিক তদন্তৰ পিচতহে ৷