ৰঙিয়াত অকৰ্তৃত্বশীলভাৱে একাংশ বিদ্যালয়ৰ চৰকাৰী বন্ধ পালন

ৰঙিয়াত আজৱ কাণ্ড ৷ চৰকাৰী নিৰ্দেশনা অবিহনে অকৰ্তৃত্বশীলভাৱে বন্ধ ৰখা বিদ্যালয়ৰ বিৰুদ্ধে দণ্ডাধীশৰ চৰজমিন অনুসন্ধানত ফাদিল প্ৰকৃত সত্য ৷

ৰঙিয়া,28 অক্টোবৰঃ দীপাৱলী পিছদিনা কামৰূপ জিলাৰ অন্তৰ্গত ৰঙিয়াত কেইবাখনো বিদ্যালয়ে অকৰ্তৃত্বশীলভাৱে বিদ্যালয় বন্ধ ৰখা কাৰ্যই তীব্ৰ প্ৰতিক্ৰিয়াৰ সৃষ্টি কৰিছে ৷ কোনো চৰকাৰী নীতি-নিৰ্দেশনা অবিহনে অঞ্চলটোৰ একাংশ চৰকাৰী-বেচৰকাৰী বিদ্যালয়ৰ কৰ্তৃপক্ষই নিজ খেয়াল-খুঁচিমতে দীপাৱলীৰ পিছদিনা বিদ্যালয় বন্ধ ৰখাৰ বিষয়ে প্ৰথম অৱগত হয় ৰঙিয়া আঞ্চলিক ছাত্ৰ সন্থা ৷ ছাত্ৰ সংগঠনটোৱে বিষয়টো কামৰূপ জিলা প্ৰশাসনক অৱগত কৰাত ৰঙিয়াৰ মহকুমাধিপতিয়ে সমগ্ৰ ঘটনাৰ ওপৰত তদন্তৰ বাবে দুজনকৈ দণ্ডাধীশক নিদেৰ্শনা প্ৰেৰণ কৰে ৷ দণ্ডাধীশ দুগৰাকীয়ে মহকুমাটোৰ কেইবাখনো বিদ্যালয়ত চৰজমিন তদন্তৰ যোগেদি বিনা চৰকাৰী নিৰ্দেশনাত বিদ্যালয় বন্ধ ৰখাতো ধৰা পেলায় ৷ লক্ষণীয়ভাৱে দীপাৱলী উপলক্ষে কামৰূপ জিলা প্ৰশাসনে কোনো বন্ধ ঘোষণা নকৰাৰ পিছতো বিদ্যালয় বন্ধ ৰখাত অভিভাৱক সকলো ক্ষুণ্ণ হৈ পৰিছে । জানিব পৰা মতে দীপাৱলীৰ পিছদিনা কেৱল কামৰূপ মেট্ৰপলিটান জিলাতহে প্ৰশাসনে চৰকাৰী বন্ধ ঘোষণা কৰিছিল ৷ তেনেস্থলত কামৰূপ জিলাত অৱস্থিত ৰঙিয়াৰ কিছুসংখ্যক বিদ্যালয়ে চৰকাৰী নিৰ্দেশনা অবিহনে বন্ধ পালন কৰা কাৰ্যত ৰাজ্যৰ শৈক্ষিক মহলে উদ্বিগ্নতা ব্যক্ত কৰিছে ৷

আৰু পঢ়ক ভাতৃ দ্বিতীয়া উপলক্ষে মঙলবাৰে 7 জিলাত স্থানীয় বন্ধ