ৰঙিয়া, 6 মে': ৰঙিয়াৰ স্পৰ্শ হাস্পতালৰ এগৰাকী ফাৰ্মাচীষ্টে চিপ লৈ আত্মহত্যা কৰাৰ পিচত এতিয়া চাঞ্চল্যৰ সৃষ্টি হৈছে ৰঙিয়াত । হাস্পতাল কৰ্তৃপক্ষৰ মানসিক নিৰ্যাতনৰ বলি হৈ আত্মহত্যা কৰাৰ অভিযোগ মৃতকৰ পৰিয়ালৰ । মৃত যুৱকজন বাক্সা জিলাৰ নাগ্ৰীজুলীৰ পাপু চক্ৰৱৰ্তী (২৯) বুলি জানিব পৰা গৈছে । উল্লেখ্য যে, মৃত যুৱকজনৰ কোঠাৰ পৰা উদ্ধাৰ হৈছে দুখনকৈ চুইছাইড নোট । জানিব পৰা মতে, চুইছাইড নোটত স্পষ্টভাৱে উল্লেখ আছে স্পৰ্শ হাস্পতালৰ চিকিৎসক ভৰত বৈশ্য আৰু দুগৰাকী মেনেজাৰৰ কথা ।
চিকিৎসক ভৰত বৈশ্য আৰু দুগৰাকী মেনেজাৰৰ মানসিক নিৰ্যাতনৰ বলি হৈ পাপুয়ে আত্মহত্যাৰ দৰে পথ বাছি ল'বলগীয়া হ'ল বুলি উল্লেখ আছে চুইছাইড নোটত । যোৱা ২৬ এপ্ৰিলত সংঘটিত হৈছিল এই আত্মহত্যাৰ ঘটনা । আত্মহত্যাৰ ১০ দিন পিচত মঙলবাৰে আৰক্ষীয়ে পাপুৱে ব্যৱহাৰ কৰা টেবুলৰ পৰা উদ্ধাৰ কৰে চুইছাইড নোট দুখন ।
আনহাতে চুইছাইড নোটত উল্লেখ আছে যে, স্পৰ্শ হাস্পতালৰ চিকিৎসক ভৰত বৈশ্যই কোনো আগজাননী নিদিয়াকৈ পাপুক চাকৰিৰ পৰা বহিষ্কাৰ কৰিছিল । যাৰ বাবে এনে চৰম সিদ্ধান্ত গ্ৰহণ কৰিবলৈ বাধ্য হৈছিল পাপু । সমগ্ৰ ঘটনাৰ ন্যায় বিচাৰি পাপুৰ ভাতৃ প্ৰণৱ চক্ৰৱৰ্তীয়ে ৰঙিয়া থানাত এজাহাৰ দাখিল কৰিছে । ইফালে স্পৰ্শ হাস্পতালৰ চিকিৎসক ভৰত বৈশ্যই অস্বীকাৰ কৰিছে পাপুৰ আত্মহত্যাত হাস্পতালৰ কোনো লোক জড়িত থকাৰ কথা । পাপুক চাকৰিৰ পৰা উলিয়াই দিয়া হোৱা নাছিল, লক্ ডাউনৰ বাবেহে কেইদিনমান আহিবলৈ মানা কৰা হৈছিল বুলি প্ৰকাশ কৰে চিকিৎসক গৰাকীয়ে । লগতে তেওঁ কয়, পাপুৰ মৃত্যুৰ সময়ত কোনো ধৰণৰ চুইছাইড নোট পোৱা নাছিল । কিন্তু এতিয়া ক'ৰ পৰা এই চুইছাইড নোট উদ্ধাৰ হ'ল তাক লৈ সন্দেহ প্ৰকাশ কৰিছে চিকিৎসক ভৰত বৈশ্যই ।
