বাইহাটা,3 জুলাই: শুকুৰবাৰে আমিনগাঁৱৰ 31 নং ৰাষ্ট্ৰীয় ঘাইপথৰ সৌন্দৰ্য বৰ্ধন সম্পৰ্কীয় এক কাৰ্যসূচীত অংশগ্ৰহণ কৰে স্বাস্থ্য মন্ত্ৰী ডঃ হিমন্ত বিশ্ব শৰ্মাই ৷ উক্ত কাৰ্যসূচীত অংশগ্ৰহণ কৰি মন্ত্ৰী গৰাকীয়ে কেইবাটাও গুৰুত্বপূৰ্ণ ঘোষণা কৰে ৷ বিশেষকৈ কৰ’ণা ভাইৰাছ সম্পৰ্কত মন্ত্ৰীগৰাকীয়ে কেইবাটাও কথা প্ৰকাশ কৰি কয় যে,পৰৱৰ্তী দুমাহৰ ভিতৰত উপলব্ধ হ’ব কৰ’ণা ভাইৰাছৰ প্ৰতিষেধক ৷ দুমাহযোৰা সংগ্ৰামৰ অন্তত ৰাজ্যবাসীয়ে এই মহামাৰীৰ পৰা সকাহ লাভ কৰিব ৷ সেয়ে পৰৱৰ্তী সময়লৈ সুস্থিৰভাৱে ৰাজ্যবাসীক অপেক্ষা কৰিবলৈ আহ্বান জনাইছে মন্ত্ৰীগৰাকীয়ে ৷
সম্প্ৰতি মহানগৰীত অব্যাহত থকা লক ডাউন সন্দৰ্ভত মন্ত্ৰী শৰ্মাই ৰাজ্য় চৰকাৰে উত্তৰ গুৱাহাটীৰো ভিন্ন অংশত অচিৰে লক ডাউন ঘোষণাৰ বাবে পৰিকল্পনা যুগুত কৰাৰ কথা প্ৰকাশ কৰে ৷ উল্লেখ্য যে,Covid-19ৰ গণ সংক্ৰমণৰ পৰা ৰাইজক ৰক্ষা কৰিবলৈ চৰকাৰে আন বিকল্প ব্যৱস্থা নথকাত লক ডাউন জাৰি কৰাৰ সিদ্ধান্ত গ্ৰহণ কৰিছে ৷ তদুপৰি এইক্ষেত্ৰত প্ৰতিখন জিলাৰ উপায়ুক্তসকলক প্ৰয়োজন সাপেক্ষে লক ডাউন জাৰি কৰিবলৈ নিৰ্দেশ প্ৰদান কৰিছে চৰকাৰে ৷
ইপিনে,ৰাষ্ট্ৰীয় ঘাইপথৰ সমীপত গছপুলি ৰোপণ কৰি নষ্টালজিক হৈ পৰে মন্ত্ৰী হিমন্ত বিশ্ব শৰ্মা। বিশেষকৈ এজাৰ ফুলৰ পুলি ৰোপণৰ পিছত এজাৰৰ সৌন্দৰ্যই সদায়ে মন্ত্ৰী গৰাকীক হাত বাউলি মতাৰ বিষয়ে প্ৰকাশ কৰে ৷ কৰ’ণাৰ আতংকময় পৰিৱেশৰ মাজতো বিভিন্ন গছ ৰোপণেৰে ৰাষ্ট্ৰীয় ঘাইপথৰ সৌন্দৰ্য বৰ্ধনৰ প্ৰচেষ্টা অব্যাহত ৰাখে মন্ত্ৰী গৰাকীয়ে । মন্ত্ৰীগৰাকীক উক্ত কাৰ্যসূচীত সহযোগ আগবঢ়াই ছয়গাঁও সমষ্টিৰ বিধায়ক ৰেকিবুদ্দিন আহমেদে ৷
লগতে চাওকঃ ৰঙাপৰাত বনৰীয়া হাতীৰ উপদ্ৰৱ
