ৰঙিয়া,26 এপ্ৰিল: ৰঙিয়াত আৰক্ষীৰ এক অভিযানত গুৱাহাটীৰ হাতীগাঁৱৰ পৰা পিতাম্বৰ হাট বজালীৰ চৰিফুল হক ওৰফে টিকলা আৰু ষ্টেডিয়াম কলনীৰ তৈয়াবৰ ৰহমান ওৰফে পাকু নামৰ দুটা গভাইত চোৰক আটক হয় । ধৃত চোৰ দুজনৰ পৰা ১১ ডাল সোণৰ গহনা, নগদ ১৬ হাজাৰ টকা, এটা ম’বাইলসহ AS 01 AT 1449 নম্বৰৰ এখন বিলাসী বাহন উদ্ধাৰ কৰে ৰঙিয়া আৰক্ষীয়ে ।
জানিব পৰা মতে, উদ্ধাৰ হোৱা সোণৰ গহনাখিনিৰ বজাৰ মূল্য প্ৰায় ১২ লাখ টকা । ৰঙিয়াত এই দুই গভাইত চোৰে কেইবাবাৰো মহিলাৰ ডিঙিৰ পৰা হাৰ কাঢ়ি নি অঞ্চলটোত চাঞ্চল্যৰ সৃষ্টি কৰিছিল । শেহতীয়াকৈ কিছুদিন পূৰ্বে এগৰাকী ভূক্তভোগী মহিলাই থানাত এজাহাৰ দাখিল কৰা পাছতে ৰঙিয়া আৰক্ষী তৎপৰ হৈ পৰে । আৰু অৱশেষত আৰক্ষীয়ে চুৰ দুটাক আটক কৰিবলৈ সক্ষম হয় ৷
উল্লেখ্য যে, কামৰূপ, বাক্সা জিলাৰ বিভিন্ন প্ৰান্তত ডকাইতি আৰু চুৰি কৰি সন্ত্ৰাসৰ সৃষ্টি কৰি অহা দুৰ্ধৰ্ষ চোৰ পাকু আৰু টিকলাক কৰায়ত্ত কৰাৰ পিছত স্বস্তিৰ নিশ্বাস পেলাইছে ৰঙিয়াৰ ৰাইজে । ইতিপূৰ্বে এই দুই গভাইত চোৰ আৰক্ষীৰ জালত বহুবাৰ পৰিছে যদিও কিছুদিন পাছতেই আইনৰ সুৰুঙাৰে জামিন লাভ কৰি পুনৰায় চুৰি কাণ্ড সংঘটিত কৰে দুয়োজনে ।
লগতে পঢ়ক : ২৬ জানুৱাৰীৰ লালকিল্লাৰ ঘটনা: জামিন লাভ কৰিলে দীপ সিদ্ধুৱে
