বকো,13 ছেপ্তেম্বৰ: দক্ষিণ কামৰূপৰ বকোস্থিত অসম গণ পৰিষদৰ মূখ্য কাৰ্যালয়ত শনিবাৰে অনুষ্ঠিত হৈ যায় অগপৰ এক সংবাদমেল ৷ বকো বিধানসভা সমষ্টিৰ বিধায়িকা নন্দিতা দাসে টুপামাৰীৰ এক সভাত অংশগ্ৰহণ কৰি অসমত অগপ দলৰ মৃত্যু হোৱা বুলি কৰা বিতৰ্কিত মন্তব্যত জাঙুৰ খাই উঠা দলটোৱে সম্বোধন কৰে এই সংবাদমেল ৷ বকোৰ অগপ দলৰ সভাপতি পৰাণজ্যোতি দাসৰ সভাপতিত্বত অনুষ্ঠিত সংবাদমেলখনত উপস্থিত থাকে বকো সমষ্টিৰ প্ৰাক্তন বিধায়ক জ্যোতিপ্ৰকাশ দাস, আব্দুল হালিমকে ধৰি বহুকেইগৰাকী দলীয় নেতা-কৰ্মী ৷
উল্লেখ্য যে,বিগত শনিবাৰে টুপামাৰীত কংগ্ৰেছৰ এক দলীয় যোগদান কাৰ্যসূচীত উপস্থিত থাকি এই বিৰূপ মন্তব্য আগবঢ়াইছিল অসম মহিলা কংগ্ৰেছৰ সভানেত্ৰী তথা বকো সমষ্টিৰ বিধায়িকা নন্দিতা দাসে ৷ বকো সমষ্টিৰ প্ৰাক্তন বিধায়ক জ্যোতিপ্ৰসাদ দাসে বিধায়িকাগৰাকীৰ ৰাজনৈতিক ক্ষেত্ৰখনৰ জ্ঞান অপৰিপক্ক বুলি উল্লেখ কৰি কঠোৰ সমালোচনা কৰে ৷ লগতে দাসে বিভিন্ন দল বাগৰিহে বকোৰ বিধায়িকা হিচাপে প্ৰতিষ্ঠিত হৈছে বুলি মন্তব্য কৰে বকোৰ প্ৰাক্তন বিধায়কগৰাকীয়ে ৷ বিধায়িকাগৰাকীয়ে নাগৰিকত্ব সংশোধনী আইনৰ প্ৰতি অসম গণ পৰিষদ দলে জনোৱা সমৰ্থন সন্দৰ্ভত সমালোচনা কৰিবলৈ গৈ উক্ত বিতৰ্কিত মন্তব্য আগবঢ়াইছিল ৷
লগতে চাওকঃ ৰাজ্যত পথ নিৰ্মাণত ব্য়য় হ'ব 11,900 কোটি টকা : হিমন্ত বিশ্ব শৰ্মা
