ৰঙিয়া, 19 নৱেম্বৰঃ অসমৰ শিক্ষা খণ্ডৰ দুৰ্দশাৰ নমুনা দাঙি ধৰা এখন বিদ্যালয় ৷ মাত্ৰ এটা কোঠাতে এগৰাকী শিক্ষকৰ দ্বাৰা পাঠদান চলিছে পাঁচটা শ্ৰেণীৰ 75জন ছাত্ৰ-ছাত্ৰীৰ ৷ ১৯৮৫ চনতে স্থাপন হোৱা আৰু ২০১৩ চনত প্ৰাদেশিকৃত ৰঙিয়া সমষ্টিৰ অন্তৰ্গত 2নং পূৱ দ্বাৰকুছি আদৰ্শ প্ৰাথমিক বিদ্যালয়ত নাই উপযুক্ত শিক্ষাৰ পৰিৱেশ ৷ এটা ভগা ঘৰত মাত্ৰ এগৰাকী শিক্ষকে চলাই আহিছে পাঁচটাকৈ শ্ৰেণীৰ পাঠদান ৷ আনহাতে বিদ্যালয়খনত ছাত্ৰ-ছাত্ৰীসকলে বহিবলৈ নাই ডেক্স-বেঞ্চৰ ব্যৱস্থা ৷ যাৰ বাবে কণ কণ ছাত্ৰ-ছাত্ৰীসকলে মাটিত বহি শিক্ষা গ্ৰহণ কৰিবলগীয়া হৈছে ৷
আনহাতে, বিদ্যালয়ৰ আন্তঃগাঁঠনিৰ নামত নামমাত্ৰ অনুদান প্ৰদান কৰিয়েই দায়িত্ব সামৰিছে সংশ্লিষ্ট বিভাগে ৷ ইতিমধ্যে ধুমুহা বৰষুণত দুবাৰকৈ বিদ্যালয় গৃহটো ভাঙি যোৱাৰ পিছত তৃতীয়বাৰৰ বাবে স্থানীয় ৰাইজৰ সহযোগত তৰ্জাৰ বেৰ দি পুনৰ বিদ্যালয় গৃহটো নিৰ্মান কৰা হৈছে ৷ এই ক্ষেত্ৰত বিদ্যালয়ৰ প্ৰধান শিক্ষক তথা অভিভাৱকলকলৰ আহ্বান অতি শীঘ্ৰেই বিদ্যালয় গৃহটো নিৰ্মাণ কৰি আৰু শিক্ষকৰ নিযুক্তি দিব লাগে বিদ্যালয়খনত ৷ অন্যথা 75জন কণ কণ শিশুৰ ভৱিষ্যত অন্ধকাৰৰ দিশে গতি কৰিব ৷
