বকো,13 জানুৱাৰী : অসমৰ গৌৰৱ মুগা কাপোৰক লৈ যেন বিপদ ঘণ্টা বজাইছে ৰেচম বিভাগে । ৰেচম বিভাগৰ চৰম গাফিলতিৰ বাবেই আজি মুগা পালকে মুগা সূতা প্ৰস্তুত কৰাৰ বাবে মুগা পলু পোহা গছ কাটি পেলোৱাৰ অভিযোগ উত্থাপন হৈছে ৷
উল্লেখ্য যে, মুগা সূতা তথা মুগা সূতাৰ পৰা প্ৰস্তুত কৰা কাপোৰে ইতিমধ্যে 2007 চনতে ভৌগোলিক চিহ্ন হিচাপে প্ৰাপ্তি লাভ কৰিছিল ৷ পৃথিৱী ব্যাপি চাহিদা থকাৰ পাচতো কেৱল ভাৰতীয় ৰেচম বিভাগৰ চৰম গাফিলতিৰ বাবেই আজি মুগা উদ্যোগ ধংসমুখত পৰিছে ।
বকোৰ জোঙাখুলি ৰাজাপাৰাত এজন মুগা পালকে প্ৰায় সাত বছৰে যত্ন কৰি ডাঙৰ দীঘল কৰা মুগা পলুৰ খাদ্য চোম গছসমূহ কাটি পেলায় । মুগা পলু পালক ইনীন্দ্ৰ মাৰাকে জনোৱা মতে, ৰেচম বিভাগে কোনো ধৰণৰ সহায়-সহযোগিতা তথা দিহা-পৰামৰ্শ নিদিয়াৰ বাবেই উপায়ন্তৰ হৈ তেওঁ গছসমূহ কাটি পেলাইছে ।
এই ক্ষেত্ৰত উদ্বেগ প্ৰকাশ কৰি তেওঁ কয় যে, সোণ গছেৰে চৰকাৰীভাৱে যদি কোনো ধৰণৰ সহায়-সহযোগিতা, দিহা-পৰামৰ্শ পোৱা নাযায়, তেন্তে তামোল গছ ৰোৱাই শ্ৰেয় ৷
লগতে পঢ়ক : পাঠশালাৰ বজাৰত ওলাইছে 40 কেজি ওজনৰ মাছ
