ছয়গাঁও, ২২ আগষ্ট : ৰাজ্যৰ ভিন্ন প্ৰান্তত অব্যাহত আছে অসম আৰক্ষীৰ (Assam Police) ড্ৰাগছ বিৰোধী অভিযান । যোৱা কেইবামাহ ধৰি আৰক্ষীৰ অভিযানত অসমৰ ভিন্ন প্ৰান্তত জব্দ হৈছে যথেষ্ট পৰিমাণৰ ড্ৰাগছ (Drugs) আৰু নিচাজাতীয় সামগ্ৰী । লগতে আৰক্ষীয়ে আটক কৰিছে বহুতো সৰবৰাহকাৰী আৰু ইয়াৰ লগত জড়িত লোকসকলক ।
মুখ্যমন্ত্ৰী ড৹ হিমন্ত বিশ্ব শৰ্মাৰ (Himanta Biswa Sarma) নিৰ্দেশমৰ্মে সকলোতে কঠোৰ হৈছে আৰক্ষী । পিছে আৰক্ষীৰ অভিযানৰ মাজতো একাংশ দুষ্টচক্ৰই নিচাজাতীয় সামগ্ৰীৰ বেহা চলাই গৈছে । তাৰ মাজতে ঠায়ে ঠায়ে আৰক্ষীয়ে অভিযান চলাই পুনৰ জব্দ কৰিবলৈ সক্ষম হৈছে সেই নিচাজাতীয় সামগ্ৰী ।
শেহতীয়াকৈ কামৰূপ আৰক্ষীও এই ক্ষেত্ৰত যথেষ্ট পৰিমাণে সষ্টম হোৱা দেখা গৈছে । বিগত কেইবাটাও দিনত কামৰূপৰ ছয়গাঁও আৰক্ষীয়ে ড্ৰাগছ আৰু নিচাজাতীয় সামগ্ৰী জব্দ কৰাৰ লগতে সৰবৰাহকাৰীক আটক কৰিবলৈ সক্ষম হৈছে । শনিবাৰে নিশা পুনৰ ছয়গাঁও আৰক্ষীয়ে ড্ৰাগছ বিৰোধী এক অভিযানত ড্ৰাগছসহ এজন লোকক আটক কৰিবলৈ সক্ষম হয় ।
ছয়গাঁও আৰক্ষী থানাৰ ভাৰপ্ৰাপ্ত আৰক্ষী বিষয়া কপিল পাঠকৰ নেতৃত্বত চলোৱা এই অভিযানত গৰৈমাৰী এলেকাৰ মহাবীৰ পথাৰৰ পৰা ড্ৰাগছসহ লোকজনক আটক কৰে আৰক্ষীয়ে ৷ আটকাধীন লোকজনৰ নাম জামালউদ্দিন বুলি জানিব পৰা গৈছে ৷ জানিব পৰা মতে উক্ত লোকজনে দীৰ্ঘদিন ধৰি নিজৰ ঘৰৰ পৰাই অঞ্চলটোত ড্ৰাগছৰ ব্যৱসায় চলাই আছিল ৷
নিশা ছয়গাঁও আৰক্ষীৰ দলটোৱে জোৰশিমলু আৰক্ষীৰ সহযোগত সাধাৰণ পোছাকত অভিযান চলাই জামালউদ্দিনক নিজ ঘৰৰ পৰাই আটক কৰে ৷ জামালউদ্দিনৰ ঘৰৰ পৰা আৰক্ষীয়ে ড্ৰাগছ ভৰ্তি ৬টা কণ্টেইনাৰ জব্দ কৰিবলৈ সক্ষম হৈছে ৷ লগতে এটা ম’বাইল ফোন জব্দ কৰে আৰক্ষীয়ে ৷
লগতে পঢ়ক : আৰক্ষীৰ জালত গাওঁৰক্ষী বাহিনীৰ উপ সভাপতিসহ পাঁচ চোৰ
