বকো, 4 ডিচেম্বৰঃ শৰীৰ চৰ্চা প্ৰতিযোগিতাত পুনৰ উজ্বলি উঠিল অসমৰ যুৱক । বকো জালুকবাৰীৰ শৰীৰ চৰ্চাবিদ দ্বীপজ্যোতি বড়োৱে লাভ কৰিলে মিষ্টাৰ ইউনিভাৰ্চ খিতাপ ।
যোৱা ৩০ নৱেম্বৰত থাইলেণ্ডৰ পাটায়া চহৰত আয়োজিত শৰীৰ চৰ্চা প্ৰতিযোগিতাত ৯০ কেজি শাখাত দ্বীপজ্যোতি বড়োৱে মিষ্টাৰ ইউনিভাৰ্চ সন্মান লাভ কৰা লগতে মিষ্টাৰ এছিয়া সন্মান লাভ কৰিবলৈ সক্ষম হয় । থাইলেণ্ডৰ পৰা বুধবাৰে গৃহভূমিত উপস্থিত হোৱাৰ পিছতে বিমান বন্দৰৰ পৰা দ্বীপজ্যোতি বড়োক অনুৰাগী, ৰাইজ, তথা দল-সংগঠনে বিপুলভাৱে আদৰণি জনাই । বকো জালুকবাৰীৰ ধ্বজেন বড়ো আৰু বিমলা বড়োৰ সন্তান দ্বীপজ্যোতি বড়োৰ সুনামে বকো অঞ্চলৰ ৰাইজক গৌৰৱান্বিত কৰিছে । প্ৰথমে স্ব-গৃহ উপস্থিত হোৱাৰ পিছতে আদিপাঠ পঢ়া জালুকবাৰী প্ৰাথমিক বিদ্যালয়ত উপস্থিত হয় শৰীৰ চৰ্চাবিদগৰাকী । বিদ্যালয়ত শিক্ষাৰ্থীসকলৰ লগত মত বিনিময় কৰাৰ পিছতে গাঁৱখনৰ শিৱ মন্দিৰলৈ আদৰি আনে ৰাইজে । তেখেতৰ উপস্থিতিত ৰাইজে মন্দিৰত আদৰণি সভা অনুষ্ঠিত কৰে ।
