গুৱাহাটী, 31 জুলাই : ৰাজ্যত অব্যাহত থকা ক'ভিড পৰিস্থিতিৰ মাজতে শনিবাৰে কামৰূপ জিলাৰ কমলপুৰত কেন্দ্ৰীয়ভাৱে জিলাখনৰ জল জীৱন মিছনৰ শুভাৰম্ভ কৰে জনস্বাস্থ্য কাৰিকৰী মন্ত্ৰী ৰণজিৎ কুমাৰ দাসে ৷ ইয়াৰ লগে লগে জিলাখনৰ মুঠ 13,367 টা পৰিয়ালে নলযোগে লাভ কৰিলে বিশুদ্ধ খোৱা পানী ৷ কমলপুৰ জনস্বাস্থ্য কাৰিকৰী বিভাগৰ অধীনস্থ দালাং গাঁৱত মন্ত্ৰীগৰাকীয়ে বন্তি প্ৰজ্বলন কৰি এই মিছনৰ শুভাৰম্ভ কৰে ৷ উল্লেখ্য যে, অসমত এই মিছনৰ বাবে কেন্দ্ৰীয় চৰকাৰে 26 হাজাৰ কোটি টকা মুকলি কৰি দিছে ৷ শনিবাৰে একেলগে কামৰূপ জিলাৰ মুঠ 17 টা পানী যোগান আঁচনি মুকলি কৰে মন্ত্ৰীগৰাকীয়ে ৷
চৰকাৰী তথ্য মতে, 2019 চনৰ পৰা আৰম্ভ কৰা প্ৰধানমন্ত্ৰী নৰেন্দ্ৰ মোদীৰ এই সপোনৰ আঁচনিখনৰ জড়িয়তে 2024 চনৰ ভিতৰত অসমৰ প্ৰতিটো পৰিয়ালে বিশুদ্ধ খোৱা পানী লাভ কৰিব ৷ মিছনৰ শুভাৰম্ভণি কৰি কৰি এই নিজৰ ভাষণ প্ৰসংগত এই কথা প্ৰকাশ কৰে মন্ত্ৰী ৰণজিৎ কুমাৰ দাসে ৷ লগতে আঁচনিখন সফল ৰূপ দিয়াৰ ক্ষেত্ৰত স্থানীয় লোকৰ সহযোগিতা বিচাৰে মন্ত্ৰীগৰাকীয়ে ৷ এক গাম্ভীৰ্যপূৰ্ণ অনুষ্ঠানত শুভাৰম্ভ কৰা জলজীৱন মিছনৰ জৰিয়তে ৰাইজে বিশুদ্ধ খোৱা পানী সেৱন কৰি মাৰাত্মক বেমাৰ কৰ্কট ৰোগ আদিৰ পৰা মুক্ত হৈ থাকিব পাৰিব বুলি মন্তব্য কৰে মন্ত্ৰী ৰণজিৎ কুমাৰ দাসে ৷
উল্লেখ্য যে, উক্ত অনুষ্ঠানৰ আদৰণি ভাষন দিয়ে কামৰূপ জিলাৰ উপায়ুক্ত কৈলাশ কাৰ্তিক এনে । এতিয়াৰ পৰা জনস্বাস্থ্য কাৰিকৰী বিভাগৰ প্ৰতি থকা নেতিবাচক ধাৰণা পৰিহাৰ কৰিবলৈ সকলোকে আহ্বান জনাই উপায়ুক্ত গৰাকীয়ে ৷
জিলা উপায়ুক্ত গৰাকীৰ উপৰিও অনুষ্ঠানত কমলপুৰ আৰু হাজো বিধানসভা সমষ্টিৰ বিধায়কদ্বয় যথাক্ৰমে দিগন্ত কলিতা আৰু সুমন হৰিপ্ৰিয়া উপস্থিত থাকি ভাষণ প্ৰদান কৰে ৷ লগতে জনস্বাস্থ্য কাৰিকৰী বিভাগৰ ফালৰ পৰা অধীক্ষক অভিযন্তা দিগন্ত বৰুৱা,কাৰ্যবাহী অভিযন্তা পৰাগমণি বৰা, সহকাৰী কাৰ্যবাহী অভিযন্তা প্ৰকাশ হালৈ, কণিষ্ঠ অভিযন্তা মোস্তাক হুছেইন আদি ভালে কেইগৰাকী অভিযন্তা-কৰ্মচাৰী উপস্থিত থাকে ৷ অনুষ্ঠানত মন্ত্ৰী ৰণজিৎ কুমাৰ দাসে দালাং আঁচনিখন পৰিচালনা কৰাৰ বাবে বোৰ্কা-সাতগাঁও পঞ্চায়তৰ সভানেত্ৰী সবিতা কলিতাৰ হাতত আনুষ্ঠানিক পত্ৰ প্ৰদান কৰে ৷
লগতে পঢ়কঃ টিংখাং-দুলীয়াজানৰ সংযোগকাৰী হিচাপে পৰিচিত টুলুঙা নাও
