আজাৰা, 3 জুলাই : শেহতীয়াকৈ গুৱাহাটী মহানগৰীত জাৰি কৰা লক ডাউনৰ সময়তে দক্ষিণ কামৰূপৰ পলাশবাৰীস্থিত পাল্লীৰ নৱাপাৰা গাঁৱৰ এক খবৰ পোহৰলৈ আহিছে । উল্লেখ্য যে, দুদিন পূৰ্বে পাল্লীৰ নৱাপাৰা গাঁৱত প্ৰকাশ কলিতা নামৰ লোক এজনৰ দেহত ধৰা পৰিছিল কৰ’ণা ভাইৰাছৰ উপস্থিতি । ইয়াৰ সমান্তৰালকৈ ৰোগীজনৰ ঘৰৰ কাষৰ অঞ্চলটো কণ্টেইমেণ্ট জ’ন হিচাপে ঘোষণা কৰিছিল স্থানীয় প্ৰশাসনে ।
কিন্তু স্থানীয় লোকৰ অভিযোগ অনুসৰি, প্ৰকাশ কলিতা নামৰ ৰোগীজনৰ ডাঙৰ ভাতৃয়ে কণ্টেইমেণ্ট জ’ন পাৰ হৈ সমীপৰ দোকানলৈ প্ৰায়ে অহা-যোৱা কৰি আছে । যাৰ ফলত এক গণসংক্ৰমণৰ আশংকাত ভুগিছে স্থানীয় লোকসকল ।
আনহাতে, শুকুৰবাৰে স্বাৱ পৰীক্ষাৰ বাবে অঞ্চলটোত স্বাস্থ্য বিভাগৰ লোক উপস্থিত হয় । কিন্তু কণ্টেইনমেণ্ট জ’নত একাঁঠু পানী উঠা দেখি স্বাস্থ্য বিভাগৰ লোকে পৰিয়ালটোৰ লগতে কৰ'ণা ৰোগীৰ সংস্পৰ্শলৈ অহা লোকসকলৰ জ’নৰ বাহিৰত স্বাৱ সংগ্ৰহ কৰে ৷
স্বাস্থ্য বিভাগ আৰু আৰক্ষী প্ৰশাসনৰ কামৰ প্ৰতি থকা এই হেমাহিৰ বাবে নৱাপাৰা অঞ্চলৰ গাঁওবাসীয়ে এক গভীৰ বিপদৰ সন্মুখীন হোৱাৰ আশংকা প্ৰকাশ কৰিছে ।
লগতে পঢ়ক : চি আই এছ এফৰ উদ্যোগত বন মহোৎসৱ উদযাপন
