বাইহাটা, ১৫ ফেব্ৰুৱাৰী: সোমবাৰে বাইহাটাৰ মদনপুৰ টোল গে'টত তীব্ৰ যানজঁট । ৩১ নং ৰাষ্ট্ৰীয় ঘাইপথেৰে যাত্ৰা কৰা যাত্ৰীসকলে প্ৰতিদিনে মদনপুৰ টোল গে'ট পাৰ হোৱাৰ সময়ত হাৰাশাস্তি ভূগিবলগীয়া হয় ।
ৰাষ্ট্ৰীয় ঘাইপথ প্ৰাধিকাৰীৰ নিয়ম অনুসৰি কৰ সংগ্ৰহৰ নামত এখন বাহনে তিনি মিনিটতকৈ অধিক সময় টোল গে'টত ৰ'ব নালাগে । কিন্তু ৰাষ্ট্ৰীয় ঘাইপথ প্ৰাধিকৰণৰ সকলো নিয়ম ধোঁৱচাঙত তুলি দি মদনপুৰ টোল গে'ট কৰ্মচাৰীয়ে কৰ সংগ্ৰহৰ নামত অতিষ্ঠ কৰিছে যাত্ৰীক ।
সোমবাৰৰ পৰা টোল গে'ট পাৰ হ'বলৈ ফাষ্টটেগ বাধ্যতামূলক কৰিছে ৰাষ্ট্ৰীয় ঘাইপথ প্ৰাধিকৰণে । ইয়াৰ বাবেও মদনপুৰ টোল গে'টত সৃষ্টি হৈছে অভাৱনীয় যানজঁট । ফলত ঘণ্টাৰ পিছত ঘণ্টা ধৰি টোল গে'টতে আৱদ্ধ হৈ পৰে বহু যান-বাহন ।
আনহাতে, একাংশ যাত্ৰীয়ে অভিযোগ উত্থাপন কৰে যে, প্ৰতিদিনে মদনপুৰ টোল গে'টত এনেদৰে যানজঁটৰ সৃষ্টি হয় আৰু ৰোগীকে ধৰি আন যাত্ৰীসকলে অসুবিধাৰ সন্মুখীন হ'বলগীয়া হয় ।
