গুৱাহাটী,26 আগষ্ট: এক লাখ চৰকাৰী চাকৰি দিয়াৰ প্ৰতিশ্ৰুতি পূৰণৰ দিশে অগ্ৰসৰ হৈছে ৰাজ্য চৰকাৰ ৷ ইয়াৰ অংশ হিচাপে বৃহস্পতিবাৰে অনুষ্ঠিত পঞ্চদশ ৰাজ্যিক কেবিনেটে নিবনুৱাৰ বাবে ভাল খবৰ কঢ়িয়াই আনিছে৷ বহু সংখ্যক নিয়োগ সৃষ্টি সিদ্ধান্ত গ্ৰহণ কৰা হয় বৃহস্পতিবাৰৰ কেবিনেটত৷ বিশেষকৈ লোক নিৰ্মাণ বিভাগত কামৰ বোজা বৃদ্ধি পোৱাৰ পৰিপ্ৰেক্ষিতত ইয়াৰ পৰিসৰ বৃদ্ধি কৰা হৈছে৷ যাৰ বাবে বিভাগটোত অচিৰেই সৃষ্টি হ'ব 804 টা নতুন পদ ৷
উল্লেখ্য যে,বিভাগটোৰ বিল্ডিং শাখাৰ সম্প্ৰসাৰণ কৰি বিভাগীয় কাৰ্যালয় বৃদ্ধিৰ লগতে নিয়োগ সৃষ্টিৰ বাবে বৃহস্পতিবাৰেকেবিনেটে সিদ্ধান্ত গ্ৰহণ কৰে ৷ এই কথা সংবাদমেল যোগে সদৰি কৰিছে স্বাস্থ্য মন্ত্ৰী কেশৱ মহন্তই ৷ মন্ত্ৰী গৰাকীয়ে জনোৱা মতে,লোক নিৰ্মাণ বিভাগৰ বিল্ডিং শাখাৰ চক্ৰ কাৰ্যালয়ৰ সংখ্যা পাঁচটাৰ পৰা 13 টালৈ বৃদ্ধি কৰা হৈছে ৷ সেইদৰে ডিভিজন অ'ফিচ 17 টাৰ পৰা 37 টা লৈ বৃদ্ধি কৰা হৈছে ৷ আনহাতে চাব ডিভিজন অ'ফিচ 49 টাৰ পৰা 77 টালৈ বৃদ্ধি কৰা হৈছে ৷
মন্ত্ৰী গৰাকীয়ে উল্লেখ কৰা মতে,নতুনকৈ সৃষ্টি কৰা এই কাৰ্যালয়সমূহৰ বাবে কাৰিকৰী ক্ষেত্ৰত 804 টা নতুন পদৰ প্ৰয়োজন হ'ব আৰু শীঘ্ৰেই এই পদসমূহ পূৰণ কৰা হ'ব ৷ কাৰিকৰী পদৰ উপৰিও ন'ন-টেকনিকেল পদো ভালেখিনি সৃষ্টি হ'ব৷
আনহাতে লোক নিৰ্মাণ বিভাগৰ ইলেক্ট্ৰিকেল শাখাৰ ডিভিজনো চাৰিটালৈ বৃদ্ধি কৰা হ'ব ৷ লোক নিৰ্মাণ বিভাগৰ বিল্ডিঙৰ বাবে অতিৰিক্ত মুখ্য অভিযন্তাৰ(চিভিল) 1 টা, অধীক্ষক অভিযন্তাৰ 10 টা, ইলেক্ট্ৰিৰ অধীক্ষক অভিযন্তাৰ 5 টা, কাৰ্যবাহী অভিযন্তাৰ (বিল্ডিং, চিভিল) 25 টা, কাৰ্যবাহী অভিযন্তাৰ (ইলেক্ট্ৰিকেল) 9 টা, সহকাৰী কাৰ্যবাহী অভিযন্তাৰ (বিল্ডিং) 63 টা, সহকাৰী কাৰ্যবাহী অভিযন্তাৰ (ইলেক্ট্ৰিকেল) 31, সহকাৰী অভিযন্তাৰ 192 টা পদ নতুনকৈ সৃষ্টি হ'ব ৷
লগতে পঢ়কঃ পহিলা ছেপ্তেম্বৰৰ পৰা খুলিব ৰাজ্যৰ শিক্ষানুষ্ঠান: ভেকচিন বাধ্যতামূলক
ইফালে বৃহস্পতিবাৰে কেবিনেটে মাজুলী,বজালী আৰু দক্ষিণ শালমৰা মানকাছৰ জিলাৰ বাবে জনস্বাস্থ্য কাৰিকৰী বিভাগৰ তিনিটা নতুন সংমণ্ডল খোলাৰ সিদ্ধান্ত গ্ৰহণ কৰিছে ৷ মাজুলীত সংমণ্ডলৰ মুখ্য সদৰ হ'ব কমলাবাৰী৷ সেইদৰে বজালীৰ বাবে হ'ব পাঠশালা আৰু দক্ষিণ শালামাৰ মানকাছৰৰ বাবে হ'ব হাটশিঙিমাৰী ৷ নতুন কাৰ্যালয় নোহোৱালৈকে বৰ্ত্তমান এছ ডি অ' অফিচতে সংমণ্ডলৰ কাম-কাজ হ'ব ৷ এই নতুন তিনিটা সংমণ্ডৰ বাবে 93 টা বিভিন্ন পদ নিযুক্তি দিয়া হ'ব ৷
লগতে পঢ়কঃ পঞ্চদশ কেবিনেটে গ্ৰহণ কৰিলে কেইবাটাও গুৰুত্বপূৰ্ণ সিদ্ধান্ত
