প্ৰসাদ, শংকৰ সংঘ আৰু এজাহাৰ বিতৰ্কঃ হাজোত চৰ্চা

বৈঠকৰ শেষত সংঘৰ বিষয় ববীয়াই গ্ৰহণ কৰিলে হয়গ্ৰীৱ মাধৱ মন্দিৰৰ প্ৰসাদ ৷ সংঘৰ ভুল স্বীকাৰৰ পিছতে হাজো আৰক্ষী থানাত দিয়া গোচৰ উঠাই লোৱাৰ সিদ্ধান্ত গ্ৰহণ কৰে পঞ্চতীৰ্থ দলৈয়ে ৷

কামৰূপ, 15 জুন: প্ৰথমে প্ৰসাদ তাৰপিচত এজাহাৰ আৰু আজি হাজোৰ হয়গ্ৰীৱ মাধৱ মন্দিৰৰ পদূলিত সংঘৰ প্ৰতিনিধি ৷ শনিবাৰে শংকৰ সংঘৰ কামৰূপ জিলা সমিতি আৰু কৰুণা কান্ত কলিতা আঞ্চলিক সমিতিৰ বিষয়ববীয়া উপস্থিত হয় হয়গ্ৰীৱ মাধৱ মন্দিৰ প্ৰাংগনত ৷ সংঘৰ প্ৰতিনিধি আৰু মন্দিৰৰ পঞ্চতীৰ্থ দলৈ শিৱ প্ৰসাদ শৰ্মা আৰু মন্দিৰ পৰিচালনা সমিতিৰে অনুষ্ঠিত হোৱা বৈঠকত সৃষ্টি হয় তুমুল বাক-বিতণ্ডা ৷ বৈঠকত দুই মেৰুত অৱস্থান দুই পক্ষৰ ৷ এই সমগ্ৰ ঘটনা সন্দৰ্ভত সংঘৰ প্ৰতিনিধিয়ে দায়ী কৰিলে সংবাদ মাধ্যমক ৷ পৰৱৰ্তী সময়ত বৈঠকৰ অন্তত শংকৰ সংঘৰ বিষয়ববীয়াই ক্ষমা বিচাৰিলে হয়গ্ৰীৱ মাধৱ মন্দিৰ পৰিচালনা সমিতিক ৷ আনকি সংঘৰ বিষয়ববীয়াই গ্ৰহণ কৰিলে হয়গ্ৰীৱ মাধৱ মন্দিৰৰ প্ৰসাদ ৷ সংঘৰ ভুল স্বীকাৰ পিছতে হাজো আৰক্ষী থানাত দিয়া গোচৰ উঠাই লোৱাৰ সিদ্ধান্ত গ্ৰহণ কৰে পঞ্চতীৰ্থ দলৈয়ে ৷

উল্লেখ্য যে, এতিয়াও অব্যাহত আছে অধ্যাপকৰ পৰিয়ালক এঘৰীয়া কৰা ঘটনাৰ প্ৰতিক্ৰিয়া । হয়গ্ৰীৱ মাধৱ মন্দিৰত ভোগ গ্ৰহণ কৰাৰ বাবে সংঘৰ সদস্য তথা অৱসৰপ্ৰাপ্ত শিক্ষক ৰত্নেশ্বৰ পাঠক আৰু পাঠকৰ পুত্ৰ গৱেষক তথা ৰামদিয়া বিচিএম কলেজৰ সহকাৰী অধ্যাপক ড: মুকুট পাঠকক শৰণ ভষ্ট হোৱা বুলি সংঘই দোষী সাব্যস্ত কৰি এঘৰীয়া কৰাৰ পিছত হয়গ্ৰীৱ মাধৱ মন্দিৰ পৰিচালনা সমিতিয়ে এজাহাৰ দিছিল হাজো আৰক্ষী থানাত । তাৰ পাছতে হাহাকাৰ লাগিছিল সংঘৰ দুই শাখাৰ মাজত ।