কামৰূপ, ২৪ এপ্ৰিল : অৱশেষত সাৰ পালে কামৰূপ জিলাৰ ৰঙিয়াৰ বন বিভাগে । নিতৌ চকুৰ সন্মুখতে অবৈধ ভাৱে শিল, বালি কঢ়িয়াই থকাৰ পাচতো কোনো ব্যৱস্থা নোলোৱা ৰঙিয়া বন বিভাগে ৰহস্যজনকভাবে নিশাটোৰ ভিতৰতে জব্দ কৰিলে তিনিখনকৈ ডাম্পাৰ । অভিযোগ অনুসৰি, বাক্সাৰ পৰা নিতৌ বন বিভাগৰ চকুত ধূলি দি অবৈধভাৱে শিল, বালি কঢ়িয়াই আহিছিল ডাম্পাৰকেইখনে । শুকুৰবাৰে নিশাও ডাম্পাৰকেইখনে শিল, বালি কঢ়িয়াই লৈ অহাৰ সময়ত বন বিভাগে চলোৱা তালাচী অভিযানত সঠিকভাৱে নথি-পত্ৰ জমা দিব নোৱাৰাৰ ফলত জব্দ কৰে তিনিখনকৈ ডাম্পাৰ ।
বৰ্তমান জব্দ কৰা ডাম্পাৰকেইখন ৰঙিয়াৰ বন বিভাগৰ কাৰ্যালয়ত ৰখা হৈছে । উল্লেখযোগ্য যে, ৰঙিয়াত ডাম্পাৰৰ দৌৰাত্ম্যৰ বিষয়ে ৰাইজে বহুবাৰ অভিযোগ কৰি আহিছে যদিও প্ৰশাসনৰ তৰফৰ পৰা কোনোধৰণৰ ব্যৱস্থা গ্ৰহণ নকৰাৰ অভিযোগ উত্থাপিত হৈছে । ইয়াৰোপৰিও, বিগত কেইমাহমানৰ ভিতৰত ৰঙিয়াত ডাম্পাৰৰ খুন্দাত বহু লোক আহত হোৱাৰ লগতে কেইবাগৰাকীৰো মৃত্যু হৈছে ।
লগতে পঢ়ক: অ’এনজিচিৰ দুই কৰ্মচাৰীক উদ্ধাৰ
