গুৱাহাটী,7 মে': সাধাৰণ যাত্ৰীৰ বাবে এতিয়া সুৰক্ষিত নহয় ৰেল যাত্ৰা ৷ সোমবাৰে অসমলৈ উভতিল বহিঃৰাজ্যত দুৰ্বৃত্তৰ আক্ৰমণত আঘাতপ্ৰাপ্ত দিলীপ হাজৰিকা ৷
কৰ্মসূত্ৰে লখিমপুৰৰ পিতা-পুত্ৰই যোৱা ২৭ এপ্ৰিলত অসমৰ পৰা কেৰালালৈ ৰে’লযোগে যাত্ৰা কৰি থকা অৱস্থাতে ২৯ এপ্ৰিলত উৰিষ্যাত দুৰ্বৃত্তৰ আক্ৰমণৰ বলি হৈছিল দুয়োগৰাকী পিতা-পুত্ৰ । ৰেল বিভাগৰ টিটি বুলি চিনাকি দি চলন্ত ৰেলতে দুৰ্বৃত্তই লুট-পাত চলাই পিতৃ দিলীপ হাজৰিকা আৰু পুত্ৰ কুশৰাম হাজৰিকাক চলন্ত ৰেলৰ পৰা গতিয়াই দিছিল । ফলত ঘটনাস্থলীতে মৃত্যুক সাৱতি ল'ব লগা হয় পুত্ৰ কুশৰাম হাজৰিকাই তথা কথমপি প্ৰাণ ৰক্ষা পৰে পিতৃ দিলীপ হাজৰিকাৰ ।
আনহাতে,এই বাতৰি সম্প্ৰচাৰ হোৱাৰ লগে লগে উৰিষ্যাত কৰ্মৰত চিৰাঙৰ মনোজ বসুমতাৰীয়ে ফনীৰ সন্ত্ৰাসকো নেওচি চিকিৎসাৰ বাবে সহায় কৰাৰ লগতে তিনিদিন ধৰি শুশ্ৰূষা কৰে দিলীপ হাজৰিকাক । কেৱল এয়াই নহয়, আঘাতপ্ৰাপ্ত ব্যক্তিজনক অসমলৈ ঘূৰাই লৈ অনাৰো সকলো ব্যৱস্থা কৰি দিয়ে যুৱকজনে । তাৰপাচতেই সোমবাৰে বৰঝাৰ বিমানবন্দৰৰ পৰা গুৰুতৰভাৱে আহত ব্যক্তিগৰাকীক উন্নত চিকিৎসাৰ বাবে গুৱাহাটী চিকিৎসা মহাবিদ্যালয়লৈ প্ৰেৰণ কৰা হয় ৷
