এডৰা মাটিক কেন্দ্ৰ কৰি বকোত ভয়ানক সংঘাত

দক্ষিণ কামৰূপৰ বকোৰ সোণতলীত দেওবাৰে ভূমি কেন্দ্ৰ কৰি এক সংঘাত সংঘটিত হয় ৷ মাত্ৰ এডৰা মাটিৰ বাবে দুটা ফৈদৰ মাজত সংঘটিত হয় এই সংঘাত ৷

বকো, 17 জানুৱাৰী : দক্ষিণ কামৰূপৰ বকোৰ সোণতলীত দেওবাৰে সংঘটিত হয় এক ভূমি কেন্দ্ৰিক সংঘাত । দুটা ফৈদৰ মাজত সংঘটিত সংঘাতৰ ফলত প্ৰচণ্ড মাৰপিট হোৱা বুলি জানিবলৈ দিছে স্থানীয় লোকে । মাৰপিটৰ ফলত বেয়াকৈ আঘাতপ্ৰাপ্ত হয় পুৰাণগাঁৱৰ এম ই স্কুলৰ প্ৰধান শিক্ষক ফটিক আলী ।

প্ৰাপ্ত অভিযোগ অনুসৰি কিচমত কাঠমি গাঁৱৰ ফটিক আলী নামৰ শিক্ষক এজনৰ এডৰা মাটি দখল কৰিবলৈ আহিছিল ৬ জনীয়া এটা দলে । মাটিৰ মালিক ফটিক আলীয়ে 6 জনীয়া দলটোক বাধা প্ৰদান কৰাত সৃষ্টি হয় আক্ৰমণ প্ৰত্যাক্ৰমণৰ ।

দুটা দলৰ মাজত সংঘটিত হোৱা আক্ৰমণ প্ৰত্যাক্ৰমণৰ ফলত ফটিক আলীক বেয়াকৈ আক্ৰমণ কৰি ৫০ হাজাৰ, পানকাৰ্ড, ভোটাৰ কাৰ্ড কাঢ়ি লোৱাৰো অভিযোগ উত্থাপন কৰিছে পৰিয়ালৰ লোকে । ফটিক আলীক আক্ৰমণ চলোৱা 6 জনীয়া দলটোৰ বিৰুদ্ধে ইতিমধ্যে সোণতলী আৰক্ষী চকীত এজাহাৰ দাখিল কৰিছে পৰিয়ালৰ লোকে ৷

উল্লেখ্য যে , অভিযোগ অনুসৰি ফটিক আলীক আক্ৰমণ কৰা লোক কেইজনৰ নাম মজিবৰ হাজী, নজৰুল হক, আজমল হক, হান্নান আলী, জামিৰুল হক আৰু ফিৰোজ খাতুন ৷

লগতে পঢ়ক: সোমবাৰে অসমলৈ আহিব দেশৰ মুখ্য নিৰ্বাচন আয়ুক্ত সুনীল অৰোৰা