ছয়গাঁও,৮ জুন: সোমবাৰে নিশা ছয়গাঁও আৰক্ষীয়ে চলোৱা এক অভিযানত দক্ষিণ লাৰুৱাজানৰ পৰা দুখন চুৰি বাইক উদ্ধাৰ কৰাৰ লগতে দুটা চোৰক গ্ৰেপ্তাৰ কৰিবলৈ সক্ষম হৈছে ৷ আৰক্ষীয়ে গ্ৰেপ্তাৰ কৰা বাইক চোৰ দুটা ক্ৰমে দক্ষিণ লাৰুৱাজানৰ চিদ্দিক আলী আৰু শুকুৰ আলী ৷
জানিব পৰা মতে, দক্ষিণ লাৰুৱাজানৰ চিদ্দিক আলীৰ ঘৰত চুৰি বাইক থকাৰ খবৰ লাভ কৰিছিল আৰক্ষীয়ে ৷ সেই খবৰৰ ভিত্তিতেই সোমবাৰে নিশা ছয়গাঁও আৰক্ষী থানাৰ ভাৰপ্ৰাপ্ত আৰক্ষী বিষয়া কপিল পাঠকৰ নেতৃত্বত চলোৱা অভিযানত আলীৰ ঘৰৰ পৰা এ এছ ১৬ ডি ৬৪১২ নম্বৰৰ বাইকখন উদ্ধাৰ কৰাৰ লগতে ব্যক্তিগৰাকীক গ্ৰেপ্তাৰ কৰিবলৈ সক্ষম হয় ৷
আনহাতে, চিদ্দিক আলীৰ পৰা এএছ ২৫ এফ ৬৬২৭ নম্বৰৰ চুৰি বাইকখন কিনাৰ অপৰাধত উক্ত গাঁৱৰে শুকুৰ আলী নামৰ লোকজনকো গ্ৰেপ্তাৰ কৰে ৷ আৰক্ষীয়ে জানিবলৈ দিয়া মতে জব্দ কৰা দুয়োখন বাইকৰে নাম্বাৰপ্লেট ভুৱা ৷
লগতে পঢ়কঃ শিলচৰত বিধায়ক পুঁজিৰ ধনৰে অক্সিজেন কনচেণ্ট্ৰেটৰ প্ৰদান