বকো, 16 মাৰ্চ : এটা বিশেষ পৰীক্ষা কেন্দ্ৰ ৷ এই পৰীক্ষা কেন্দ্ৰটোৰ সমূখত ভিৰ কৰিছে শতাধিক মগনীয়াই (beggars queue in front of exam center)৷ কোনোবাজন আকৌ আহিছে ধৰ্মীয় অনুষ্ঠানৰ বাবে সাহায্য বিচাৰি ৷ চাইকেল,বাইক, গাড়ী অহা-যোৱা কৰি থকা এটা ব্যস্ত পথৰ দুয়োকাষে দীঘলীয়াকৈ দেখা গৈছে মগনীয়াৰ শাৰী ৷ হাতত ভিক্ষাৰ পাত্ৰ লৈ সহায় মাগিছে এইসকল মগনীয়াই ৷ যিয়ে যেনেকৈ পাৰিছে এটকা-দুটকাৰ পৰা দহ-বিছ টকালৈ দান কৰিছে ৷
কামৰূপৰ ছয়গাঁও সমষ্টিৰ গৰৈমাৰীৰ মাজৰটোপ পৰীক্ষা কেন্দ্ৰ এইটো (HSLC Exam center in Goroimari)। হাইস্কুল শিক্ষান্ত পৰীক্ষাৰ প্ৰথম দিনা এইদৰেই পৰীক্ষা কেন্দ্ৰটোলৈ যোৱা পথত ভিৰ কৰিলে শতাধিক মগনীয়াই ৷ পৰীক্ষাৰ্থীয়েও দান দি আশীৰ্বাদ ল’লে তেওঁলোকৰ পৰা ৷ এই কেন্দ্ৰটোত পৰীক্ষা দিবলৈ আহিছে প্ৰায় আঠ শতাধিক পৰীক্ষাৰ্থী ৷ জানিব পৰা মতে প্ৰতিবছৰেই মেট্ৰিক পৰীক্ষাৰ প্ৰথম দিনটোত এইদৰে পৰীক্ষা কেন্দ্ৰটোৰ সমুখত ভিৰ কৰেহি মগনীয়াই ৷ এইবাৰো তাৰ ব্যতিক্ৰম নহ’ল ৷ পৰীক্ষাৰ্থীৰ পৰা দান-বৰঙণি লৈ আশীৰ্বাদ দিবলৈ আহিল শতাধিক মগনীয়া ৷
বাহিৰত এই পৰিবেশ হ’লেও কিন্তু পৰীক্ষা কেন্দ্ৰৰ ভিতৰত নীতি-নিয়ম সম্পূৰ্ণ মানি চলা হৈছে ৷ ছেবাৰ নিয়ম অনুসৰি তন্ন তন্নকৈ পৰীক্ষা কৰা হৈছে প্ৰতিগৰাকী পৰীক্ষাৰ্থীক ৷ যাতে কোনেও কোনো অসৎ উপায় অৱলম্বন কৰিব নোৱাৰে তাৰো ব্যৱস্থা কৰা হৈছে পৰীক্ষা কেন্দ্ৰটোত ৷
লগতে পঢ়ক : মৃত অভিযুক্ত বিকিৰ দেহত ৪ টা গুলীৰ চিন স্পষ্ট : অভিজিৎ শৰ্মা
