বাইহাটা চাৰিআলি, 20 জানুৱাৰী : বাইহাটা চাৰিআলিৰ কমলপুৰৰ সুন্দৰিশাল গাঁৱৰ মিন্টু পাঠক নামৰ এজন যুৱকে নিৰ্মাণ কৰি উলিয়াইছে এখন প্ৰদূষণ মুক্ত মটৰ চাইকেল । প্ৰায় তিনিমাহ জোৰা কঠোৰ পৰিশ্ৰমৰ অন্তত মিন্টু পাঠকে নিৰ্মাণ কৰি উলিয়াই বাহন খন । মটৰ চাইকেলখনত ইঞ্জিনৰ পৰিবৰ্তে আছে 48 ভল্টৰ এটা মটৰ, ১২ ভল্টৰ চাৰিটা বেটাৰি আৰু এটা কন্ট্ৰোলাৰ । পুৰণি পেলনীয়া মটৰ চাইকেলৰ থেচিচতে যুৱকজনে নিৰ্মাণ কৰি উলিয়াই এই মটৰ চাইকেলখন । মটৰ চাইকেলখন নিৰ্মাণৰ বাবে প্ৰয়োজনীয় আহিলাৰ কিছু অংশ অনলাইনযোগে গুজৰাটৰ পৰা আমদানি কৰাৰ কথা মিন্টুৱে জানিবলৈ দিয়ে ।
মটৰ চাইকেলখনৰ নিৰ্মাণ বাবদ মুঠ ২৭ হাজাৰ টকা ব্যয় হৈছে বুলি উল্লেখ কৰে মিন্টু পাঠকে । তেওঁ লগতে দৈনিক 6 ঘণ্টাৰ পৰা 8 ঘণ্টা মটৰ চাইকেলখনৰ বেটাৰ চাৰ্জ কৰি 40 কিল'মিটাৰ অনায়াসে চলাব পাৰি বুলি উল্লেখ কৰে । কোনো কাৰিকৰী শিক্ষাৰ অবিহনে মটৰ চাইকেলখন নিৰ্মাণ কৰি উলিয়াইছে মিন্টু পাঠকে । মিন্টুৰ এই সফলতাত গৌৰৱাম্বিত মিন্টু পৰিয়ালৰ লগতে অঞ্চলবাসী ।
