বাইহাটা,ৰহা, 9 অক্টোবৰঃ পূজাৰ আনন্দ উল্লাসৰ মাজতে বাইহাটা চাৰিআলিত সংঘটিত হ’ল এক শোকাৱহ দুৰ্ঘটনা ৷ প্ৰতিমা বিসৰ্জন দিবলৈ যোৱা গাড়ীৰ চেপাত নিহত এজন লোক ৷ নিহত ব্যক্তিজন বাইহাটা চাৰিআলিৰ মহিপাল কুছি গাৱঁৰ তিলক ডেকা ৷ বিজয় দশমীৰ সন্ধিয়া তিলক ডেকায়ো ৰাইজৰ সৈতে প্ৰতিমা বিসৰ্জন দিবলৈ গৈছিল ৷ কিন্তু লোকজন হঠাৎ গাড়ীৰ পৰা পৰি যোৱাত পিচে পিচে আহি থকা অন্য গাড়ীৰ চেপাত ঠিতাতে নিহত হয় লোকজন ৷
বাইহাটা চাৰিআলিৰ লগতে ৰহাত সংঘটিত হয় ভয়ংকৰ পথ দুৰ্ঘটনা ৷ বুধবাৰে বিয়লি ভয়ংকৰ দুৰ্ঘটনাত পতিত হয় এখন চুইফট ডিজায়াৰ গাড়ী ৷ নগাৱঁৰ পৰা গুৱাহাটী অভিমুখে তীব্ৰ বেগেৰে আহি থকা AS 02Y 1715 নম্বৰৰ ছুইফট ডিজায়াৰ গাড়ীখনে নিয়ন্ত্ৰণ হেৰুৱাই পথৰ কাষৰ খুটাত প্ৰচণ্ড খুন্দা মাৰে ৷ গাড়ীৰ খুন্দাত পথৰ কাষৰ খুটা উভালি গৈ প্ৰচণ্ড আঘাত কৰিলে কাষৰ এখন দোকানত ৷ ফলত দোকানৰ বেৰ ভাগি গৈ আঘাত কৰে অৰূপ নাথ নামৰ দোকানীজনক ৷
উল্লেখ্য যে, দোকানীজনক সংকটজনক অৱস্থাত ততাতৈয়াকৈ চিকিৎসালয়লৈ প্ৰেৰণ কৰা হৈছে ৷ দুৰ্ঘটনাটোৰ ফলত চুইফট ডিজায়াৰখন চুচুৰ্মৈ হৈ পৰে যদিও সৌভাগ্যক্ৰমে ৰক্ষা পৰে ভিতৰত থকা চাৰিগৰাকী যাত্ৰী ৷
