বাইহাটা, 1 এপ্ৰিল: বৃহস্পতিবাৰে ৰাজ্যত অনুষ্ঠিত হোৱা দ্বিতীয় পৰ্যায়ৰ ভোট গ্ৰহণত কমলপুৰ সমষ্টিৰ ভোট কেন্দ্ৰ পৰিদৰ্শনৰ বাবে বাইহাটাত উপস্থিত হয় সাংসদ দিলীপ শইকীয়া ৷ ভোট কেন্দ্ৰ পৰিদৰ্শন কৰি সাংসদ গৰাকীয়ে কয়, দ্বিতীয় পৰ্যায়ৰ 39 টা সমষ্টিৰ 30 খন আসনে লাভ কৰিব বিজেপিয়ে ৷ প্ৰথম আৰু দ্বিতীয় পৰ্যায়ৰ আসনে বিজেপিৰ মেজিক নম্বৰ অতিক্ৰম কৰিব ৷
বদৰুদ্দিন আজমলক কটাক্ষ কৰি সাংসদ গৰাকীয়ে কয়, আজমল অসমৰ প্ৰধান শত্ৰু ৷ আজমলে গামোচা দলিয়াই অসম তথা অসমীয়াৰ স্বাভিমানক অপমান কৰিছে । ইয়াৰ প্ৰত্যুত্তৰ সকলো অসমীয়াকে দিবলৈ আহ্বান জনাই সাংসদ গৰাকীয়ে ।
লগতে প্ৰথম পৰ্যায়ত অসমৰ ৰাইজে যি অভূতপূৰ্ব সহাৰি জনাই বিজেপিক ভোট দান কৰিছিল তাতকৈ বেছি উৎসাহ আৰু উদ্দীপনাৰে দ্বিতীয় পৰ্যায়ত ভোট দান কৰা বুলি মন্তব্য কৰে সাংসদ গৰাকীয়ে । ইয়াৰোপৰি প্ৰথম আৰু দ্বিতীয় পৰ্যায়ৰ আসনেৰে চৰকাৰ গঠন কৰিব পৰা যাব, তৃতীয় পৰ্যায়ৰ আসন খিনি বিজেপিৰ বাবে বোনাচ হ'ব বুলিও উল্লেখ কৰে দিলীপ শইকীয়াই ৷
লগতে পঢ়ক: কাটিগড়াত ভোটকেন্দ্ৰত শিলাবৰ্ষণ
