গুৱাহাটী, 21 এপ্ৰিল: কৰ'ণা ভাইৰাছৰ সংক্ৰমণ ৰোধৰ বাবে কেন্দ্ৰ চৰকাৰে যোৱা 24 মাৰ্চৰ পৰা ঘোষণা কৰা লক ডাউন অব্যাহত থকাৰ মাজতে মঙলবাৰৰ পৰা ৰাজ্যত আৰম্ভ হৈছে চৰকাৰী কাম কাজ ৷ জনতা ভৱনতো মঙলবাৰৰ পৰা আৰম্ভ হৈছে কাম কাজ ৷ পুৱাৰ ভাগত ৰাজ্যিক পৰিবহন নিগমৰ বিশেষ বাছেৰে বিভিন্ন চৰকাৰী কাৰ্যালয় সমূহৰ লগতে জনতা ভৱনত উপস্থিত হয় জনতা ভৱনৰ কৰ্মচাৰীসকল ৷ ইয়াৰ পাছতে জনতা ভৱনত উপস্থিত হৈ প্ৰতিজন কৰ্মচাৰীয়ে হেণ্ড ৱাছেৰে হাত ধুই আৰু চেনিটাইজ কৰি জনতা ভৱনত প্ৰৱেশ কৰে ৷
উল্লেখ্য যে, চৰকাৰী কৰ্মচাৰী সকলে কাৰ্যালয়ত মাস্ক পৰিধান কৰাৰ লগতে বাধ্যতামূলক ভাৱে সামাজিক দুৰত্ব বজাই ৰাখি কাম কৰিব লাগিব বুলি নিৰ্দেশনা প্ৰদান কৰিছে চৰকাৰে ৷ কৰ'ণা ভাইৰাছৰ সংক্ৰমণ ৰোধৰ বাবে প্ৰায় এমাহ ধৰি কাম বন্ধ হৈ থকা জনতা ভৱনত উপস্থিত হৈ পুনৰ নিজৰ নিজৰ কৰ্মক্ষেত্ৰলৈ উভতি অহাৰ বাবে কৰ্মচাৰী সকলৰ মাজত পৰিলক্ষিত হয় বিশেষ উৎসাহ ৷ উল্লেখ্য যে ৰাজ্যত কভিড-19 কৰ'ণা ভাইৰাছৰ সংক্ৰমণৰ ক্ষেত্ৰত দেশৰ কেইবাখনো ৰাজ্যৰ তুলনাত অসমৰ স্থিতি সন্তোষজনক হোৱাৰ বাবে ৰাজ্য চৰকাৰে মঙলবাৰৰ পৰা চৰকাৰী কাম কাজ পুনৰ আৰম্ভ কৰাৰ সিদ্ধান্ত গ্ৰহণ কৰিছে ৷ চৰকাৰী কাম কাজৰ লগতে অত্যাৱশ্যকীয় সেৱা সমূহৰ ক্ষেত্ৰতো ৰেহাই প্ৰদান কৰিছে চৰকাৰে ৷ সমগ্ৰ দেশৰ লগতে অসমতো 3 মাৰ্চ পৰ্যন্ত অব্যাহত থাকিব লক ডাউন ৷ উল্লেখনীয় যে লক ডাউনৰ ক্ষেত্ৰত ৰাজ্য চৰকাৰে কোনো ধৰণৰ শিথিলতা প্ৰদান কৰা নাই,বিশেষ কিছুমান ক্ষেত্ৰতহে ৰেহাই প্ৰদান কৰিছে চৰকাৰে ৷
লগতে পঢ়কঃ মুখ্য সচিব-আৰক্ষী সঞ্চালক প্ৰধানৰ সংবাদমেল
