গুৱাহাটী,22 জুলাইঃ এম জি ভি কে ভানু,ৰাজ্যবাসীৰ এক চিনাকী নাম ৷ অসমত কংগ্ৰেছৰ পোন্ধৰ বছৰীয়া শাসনকালত অখণ্ড প্ৰতাপী আমোলাৰূপে বিশেষ পৰিচয় আছিল এম জি ভি কে ভানুৰ ৷ কিন্তু লোকসভা নিৰ্বাচনত পৰাজয়ৰ পিছৰে পৰা কোনো খবৰ নাই এসময়ত শোণিতপুৰ জিলাৰ উপায়ুক্ত হিচাপে কাৰ্যনিৰ্বাহ কৰি অতিৰিক্ত মুখ্য সচিবৰূপে অৱসৰ গ্ৰহণ কৰা ভানুৰ ৷
উল্লেখযোগ্য যে,অৱসৰ গ্ৰহণ কৰাৰ পিছতে প্ৰতাপী আমোলা গৰাকীয়ে যোগদান কৰিছিল কংগ্ৰেছ দলত ৷ কেৱল ইমানেই নহয়,আমোলাগৰাকীয়ে বিগত লোকসভা নিৰ্বাচনত তেজপুৰ সংসদীয় সমষ্টিৰ পৰা কংগ্ৰেছ প্ৰাৰ্থী হিচাপে বিজেপি প্ৰাৰ্থী পল্লৱলোচন দাসৰ বিপৰীতে অৱতীৰ্ণ হৈছিল ৷ কিন্তু বিজেপি প্ৰাৰ্থী পল্লৱলোচন দাসৰ হাতত পৰাজিত হৈছিল তেওঁ ৷ ২০১৯ ৰ ১১ ফেব্ৰুৱাৰীত কংগ্ৰেছত যোগদান কৰা ভানুৱে সেই বছৰৰে ৩০ অক্টোবৰত বিদায় লৈছিল কংগ্ৰেছৰ পৰা ।
কংগ্ৰেছৰ পৰা পদত্যাগ কৰাৰ পিছতে সলনি হ'ল এম জি ভি কে ভানুৰ ঠিকনা ৷ তেনেহ'লে বৰ্তমানে ভানুৰ ঠিকনা কি ? এই বিষয়ে এতিয়া একোৱেই নাজানে অসম প্ৰদেশ কংগ্ৰেছ কমিটিয়েও ৷ ভানু সন্দৰ্ভত প্ৰদেশ কংগ্ৰেছৰ সাধাৰণ সম্পাদক দুৰ্গাদাস বড়োৱে মন্তব্য কৰে যে, চাকৰিৰ পৰা অৱসৰ লোৱাৰ পিছত ভানুৰ দৰে বহু উচ্চ প্ৰশাসনিক বিষয়াই বহু উচ্চাকাংক্ষা লৈ ৰাজনীতিলৈ অহাৰ উদাহৰণ আছে । কিন্তু তাৰ ভিতৰত তিস্তি থাকে কেইজনমানহে । উচ্চাকাংক্ষা পূৰণ নহ'লেই তেওঁলোকে ৰাজনীতিৰ পৰা বিদায় লয় ।
ইপিনে,এক সূত্ৰ মতে,এম জি ভি কে ভানু সম্প্ৰতি বাংগালুৰুত এটা বিশেষ কোম্পানীত ব্যস্ত হৈ আছে ৷ ৰাজনীতিৰ পৰাও এতিয়া বহু আঁতৰত অৱস্থান লৈছে কংগ্ৰেছৰ শাসন কালৰ প্ৰতাপী আমোলাগৰাকীয়ে ৷
লগতে পঢ়কঃবাঘজানত পুনৰ দুৰ্ঘটনা : তৈলক্ষেত্ৰত বিস্ফোৰণত আহত তিনি বিশেষজ্ঞ
