ৰঙিয়া, 17 ছেপ্টেম্বৰ: চৰকাৰলৈ বাট নাচাই পথ নিৰ্মাণ কৰিবলৈ ওলাই আহিছে এখন গাঁৱৰ ৰাইজ (Villagers came out to construct poor road) ৷ হাতে হাতে কোৰ, চাঙি আৰু বস্তা লৈ উলাই আহিছে ৰঙিয়াৰ চেনীমাৰা-বিহাপাৰাৰ একাংশ ৰাইজ । শিশুৰ পৰা বৃদ্ধলৈকে সকলোৱে অংশগ্ৰহণ কৰিছে পথ নিৰ্মাণ কাৰ্যত (Everyone participates in road construction)। লক্ষ্য মাত্ৰ এটাই যিকোনো প্ৰকাৰে পথচোৱা যাতায়তৰ উপযোগী কৰি তুলিব লাগে ৷
গৃহিনীসকলোকো দেখা গ’ল শ্ৰমদান কাৰ্যসূচীত । মুঠৰ ওপৰত অঞ্চলটোৰ ৰাইজ একত্ৰিত হৈ গাঠিৰ ধন ভাঙি প্ৰায় ১ কিলোমিটাৰ পথ নিৰ্মাণত লাগি পৰিছে । মন কৰিবলগীয়া যে, দুগৰাকী স্থানীয় লোকে দান দিছিল পথচোৱাৰ বাবে মাটি ৷ সেই মাটিত অঞ্চলটোৰ ৰাইজে গাঠিৰ ধন খৰচ কৰি নতুনকৈ পথটো নিৰ্মাণ কৰিবলৈ দিনে-নিশাই অহৰহ চেষ্টা কৰি চলাই আছে ।
গাঁওখনৰ ৰাইজৰ উদ্দেশ্য এটাই, পথটো যিকোনো প্ৰকাৰে সম্পূৰ্ণ কৰি কোনোমতে যাতায়তৰ উপযোগী কৰি তুলিব লাগে, যাতে পথচোৱা সাময়িকভাৱে হলেও চলাচলৰ বাবে উপযোগী হৈ উঠে ।
উল্লেখযোগ্য যে, চৈধ্য বছৰ পূৰ্বে ৰঙিয়াৰ চেনীমাৰা-বিহাপাৰা সংযোগী পথটো বৰলীয়া নৈৰ বানে সম্পূৰ্ণ বিচ্ছিন্ন কৰি পেলাইছিল (Flood completely cut off the road)। ৰাইজৰ বহু আবেদন-নিবেদনৰ পিছতো পছচোৱা মেৰামতি কৰাৰ ক্ষেত্ৰত কোনো কাণ সাৰ নিদিলে বিভাগীয় কতৃপক্ষ কিম্বা স্থানীয় জনপ্ৰতিনিধিয়ে ৷ আজিকোপতি পথচোৱাৰ ওপৰত দৃষ্টি নপৰিল এজনো জনপ্ৰতিনিধিৰ ।
দেশৰ স্বাধীনতাৰ ৭৬ বছৰৰ পিছতো অনগ্ৰসৰ এই অঞ্চলটোৰ এই গুৰুত্বপূৰ্ণ পথটো পুনঃনিৰ্মাণ কৰি যাতায়তৰ বাবে সুচল কৰি নিদিয়াত অঞ্চলবাসীয়ে সদায় ভুগ কৰি আহিছে যমৰ-যাতনা ।
বিশেষকৈ ছাত্ৰ-ছাত্ৰীসকলৰ লগতে বৃদ্ধ লোকসকলে বোকা-পানী গছকি পথচোৱাৰে অতি কষ্টেৰে অহা-যোৱা কৰি আহিছে । ইফালে জৰুৰীকালীন সময়ত জৰাজীৰ্ণ পথটোৰে বৃহত্তৰ অঞ্চলটোলৈ এম্বুলেঞ্চ অথবা অগ্নি নিৰ্বাপক বাহিনীৰ বাহনো যাব নোৱৰাত আন এক গুৰুত্বপূৰ্ণ সমস্যাৰ সন্মুখীন হ’বলগা হয় ৰাইজ ।
ৰাইজৰ অভিযোগ, পথচোৱা মেৰামতিৰ বাবে বাৰম্বাৰ বিভাগীয় কতৃপক্ষ তথা স্থানীয় জনপ্ৰতিনিধিক আবেদন নিবেদন কৰি অহাৰ পিছতো কোনো গুৰুত্ব নিদিলে ৷ উপায়বিহীন হৈ স্থানীয় দুগৰাকী লোকে পথটোৰ বাবে নিজৰ পথাৰৰ মাটি দান কৰে গাঁওবাসী ৰাইজক । ইয়াৰ পাছতে ভিতৰুৱা তথা পিছপৰা অঞ্চলটোৰ ৰাইজে নতুনকৈ সেই মাটিত নতুনকৈ আৰম্ভ কৰিছে গুৰুত্বপূৰ্ণ পথটো নিৰ্মাণৰ কাম ।
অৱস্যে এই পথটো এক উদাহৰণ হে মাথো ৷ ৰাজ্যত এতিয়াও এনে বহু পথ আছে যি আজিও হৈ আছে ব্যৱহাৰৰ অনুপযুক্ত ৷ যি সময়ত চৰকাৰখনে ৰাজ্যৰ উন্নয়ণৰ ঢাক-ঢোল বজাই উন্নতি হৈ অহা বুলি হৈ চৈ কৰি আহিছে, তেনে সময়ত এনে জৰাজীৰ্ণ পথে সকলোকে পুনৰ এবাৰ ভাৱিবলৈ বাধ্য কৰিছে, সঁচাকৈয়ে আমি দেখিছোনে উন্নয়নৰ মুখ ৷
লগতে পঢ়ক: বোকাময় পথত বাগৰি বাগৰি প্ৰতিবাদ সাব্যস্ত কৰিলে যুৱকে
