গুৱাহাটী,২৬ আগষ্ট : ৰাজ্যত বিগত চাৰিটা দশকত জব্দ তথা উদ্ধাৰ কৰা গঁড়ৰ আঢ়ৈ হাজাৰ খৰ্গৰ উপৰিও আন জন্তুৰ অংগ ধ্বংস কৰাৰ বাবে বন আৰু পৰিৱেশ বিভাগে উদ্যোগ গ্ৰহণ কৰিছে । বিশেষকৈ বিগত চাৰিটা দশকত চোৰাংচিকাৰী তথা সৰবৰাহকাৰীৰ পৰা জব্দ কৰা তথা মৃত গড়ৰ পৰা উদ্ধাৰ কৰা আঢ়ৈ হাজাৰ খৰ্গ ধ্বংস কৰাৰ পৰিকল্পনা কৰিছে বিভাগটোৱে । বন বিভাগত শীৰ্ষ সূত্রই সদৰি কৰা মতে এই প্ৰক্ৰিয়াটো সম্পন্ন কৰাৰ বাবে ৰাজহুৱা শুনানি গ্ৰহণ কৰা হ'ব ।
এই সন্দৰ্ভত ২৯ আগষ্টত গুৱাহাটীৰ জালুকবাৰীস্থিত অসম বন বিদ্যালয়ৰ (Assam Forest School) চৌহদত ৰাজহুৱা শুনানি গ্ৰহণ কৰা হ'ব । এই শুনানিৰ পাছতে বন বিভাগে চূড়ান্ত সিদ্ধান্ত গ্ৰহণ কৰিব । অৱশ্যে গঁড়ৰ সকলো খৰ্গ ধ্বংস কৰা নহয় । পৰীক্ষা-নিৰীক্ষা আৰু শৈক্ষিক গৱেষণাকে ধৰি বিভিন্ন কাৰণত পাঁচ শতাংশ খৰ্গ সংৰক্ষণ কৰা হ'ব ।
লক্ষণীয় বিষয় যে জব্দ কৰা তথা উদ্ধাৰ কৰা খৰ্গৰ পৰীক্ষণৰ বাবে ২০১৬ চনত ৰাজ্যিক পৰ্যায়ৰ উচ্চস্তৰীয় কমিটি গঠন কৰা হৈছিল । কমিটিয়ে পৰীক্ষণত আঢ়ৈ হাজাৰ খৰ্গ লাভ কৰিছিল । লক্ষণীয় বিষয় যে গঁড়ৰ খৰ্গসমূহ সংৰক্ষিত কৰি ৰাখিলে ইয়াৰ মূল্য আছে বুলি থকা ধাৰণাটোক উদগনি দিয়া হ'ব । যাৰ বাবে এই খৰ্গসমূহ ধ্বংস কৰাৰ পৰিকল্পনা কৰা হৈছে ।
উল্লেখ্য যে চীন আৰু ভিয়েটনামকে ধৰি বিভিন্ন ৰাষ্ট্ৰত গঁড়ৰ খৰ্গ পৰম্পৰাগত মেডিচিন হিচাপে ব্যৱহাৰ কৰা হয় । যাৰ বাবে আন্তঃৰাষ্ট্ৰীয় বজাৰত গঁড়ৰ খৰ্গৰ যথেষ্ট মূল্য আছে আৰু ইয়াৰ বাবে গঁড় হত্যা কৰা হয় । অসম এশিঙীয়া গঁড়ৰ বাবে বিশ্ব বিখ্যাত আৰু ইয়াত ইয়াৰ সংখ্যা সৰ্বাধিক ।
২০১৮ চনৰ গণনা অনুসৰি অসমত থকা গঁড়ৰ সংখ্যা হৈছে ২,৬৫০ টা আৰু ইয়ৰে ২,৪০০ টা কাজিৰঙাত আছে । বিভাগীয় সূত্রত প্ৰকাশ যে শেহতীয়াকৈ ছটা মাণ্ডলিক কমিটিৰ যোগেদি জব্দ তথা উদ্ধাৰ কৰা জন্তুৰ অংগসমূহ অতি সুক্ষ্মভাৱে পৰীক্ষা-নিৰীক্ষা কৰাৰ ব্যৱস্থা কৰা হৈছে । এই কাৰ্যত ফৰেঞ্চিক পৰীক্ষাগাৰো (forensic laboratory) জড়িত হৈ আছে ।
আৰক্ষী-প্ৰশাসনৰ লোকৰ উপস্থিতিত এই কাৰ্য সম্পাদন কৰা হৈছে আৰু স্বচ্ছতা বজাই ৰখাৰ বাবে ভিডিঅ' ৰেকৰ্ডিঙৰ লগতে পোনপটীয়াকৈ প্ৰত্যক্ষ কৰাৰো ব্যৱস্থা কৰা হৈছে । বিভাগীয় শীৰ্ষ বিষয়াই জনোৱা মতে কামৰূপ মহানগৰ, বৰপেটা আৰু মৰিগাঁও জিলাৰ পৰীক্ষণ কাৰ্য ইতিমধ্যে সম্পূৰ্ণ হৈছে । শোণিতপুৰ, নগাঁও, গোলাঘাট আৰু ৰাজ্যৰ আন জিলাত পৰীক্ষণৰ কাম অব্যাহত আছে ।
তিনিখন জিলাত পৰীক্ষণ কাৰ্য সম্পূৰ্ণ কৰা ২৬১ টা খৰ্গৰ ভিতৰত ২৪১ টা ধ্বংস কৰাৰ বাবে চিনাক্ত কৰা হৈছে । আনহাতে বাকী ১৮ টা সংৰক্ষিত কৰা হ'ব । ইফালে ইতিমধ্যে নষ্ট হৈ যোৱা গঁড়ৰ খৰ্গসমূহ ২২ ছেপ্তেম্বৰৰ 'নেচনেল এলিফেণ্ট এপ্ৰিচিয়েশ্বন দিৱস'ৰ (National Elephant Appreciation Day) দিনা ধ্বংস কৰাৰ পৰিকল্পনা কৰিছে বন বিভাগে ।
লগতে পঢ়ক:ৰাজ্যৰ ১০ শতাংশ লোকেহে লাভ কৰিছে ক'ভিডৰ দুয়োপালি ভেকচিন
