সাত বজাৰ শীৰ্ষ দহটা বাতৰি...

সাত বজাৰ শীৰ্ষ দহটা বাতৰি...

মন্ত্ৰী ড৹ হিমন্ত বিশ্ব শৰ্মাৰ বাসগৃহত উপস্থিত অগপৰ সভাপতি অতুল বৰা আৰু কাৰ্যকৰী সভাপতি কেশৱ মহন্ত । এই সাক্ষাৎ এক সৌজন্যমূলক সাক্ষাৎ বুলি মন্তব্য অগপৰ সভাপতি গৰাকীৰ ৷

২০২১ ৰ বিধানসভা নিৰ্বাচনত কাৰাগাৰৰ পৰা প্ৰতিনিধিত্ব কৰা কৃষক নেতা তথা ৰাইজৰ দলৰ প্ৰাৰ্থী অখিল গগৈৰ নিৰ্বাচনী জয়ত সন্তোষ প্ৰকাশ মাতৃ প্ৰিয়দা গগৈৰ । অনাগত সময়ত সমষ্টি উন্নয়নৰ বাবে, ৰাইজৰ বাবে কৰণীয় সকলোখিনি কাম কৰিবলৈ উৎসাহ আৰু পৰামর্শ দিব বুলি জনাইছে মাতৃ গৰাকীয়ে ৷ ৰাজনীতিলৈ আহিলেও অখিলৰ নীতি আদর্শ সালসলনি নহয় বুলি ষ্পষ্টকৈ কৈছে মাতৃ প্ৰিয়দা গগৈয়ে ।

শিৱসাগৰৰ জনতাই বিজয়মালা পিন্ধালে কৃষক নেতা অখিল গগৈক ।‌‌ কিন্তু এই‌ বিজয়ে কাৰাগাৰৰ পৰা‌ উলিয়াই আনিব পাৰিবনে তেওঁক ! নে স্বাভাৱিক গতিতে আগবাঢ়িব আইনী প্ৰক্ৰিয়া ! অসমৰ প্ৰতি গৰাকী সচেতন লোকৰ মনত উত্থাপিত এই প্ৰশ্নৰ‌ উত্তৰ কি ?

মাজুলী সমষ্টিত সৰ্বানন্দ সোণোৱালে জয় লাভ কৰাৰ পাচতে সমষ্টিবাসীৰ মাজত এক প্ৰকাৰ বিজয় উল্লাস দেখিবলৈ পোৱা গৈছে ৷ সমষ্টিটোৰ পৰা বিপুল সংখ্যক ভোটত জয় লাভ কৰাৰ পাছতেই ডেকা শেনছোৱাৰ গাঁওবাসীয়ে আনন্দতে 3 হাজাৰ বন্তি জ্বলাই ক’ভিড প্ৰ’টকলৰ মাজেৰে ‘আকৌ এবাৰ সৰ্বা চৰকাৰ’ লিখি বিজয় উৎসৱ অনুষ্ঠিত কৰে ৷

নলবাৰী জিলাৰ 3টাকৈ সমষ্টিৰ ফলাফল ঘোষণা হ'ল দেওবাৰে ৷ তিনিটা সমষ্টিৰ ভিতৰত দুটা সমষ্টি বিজেপিৰ দখললৈ যোৱাৰ সমান্তৰালভাৱে জিলাখনৰ উল্লেখযোগ্য বৰক্ষেত্ৰী সমষ্টি আহিল কংগ্ৰেছৰ দখললৈ ৷ অসমৰ প্ৰাক্তন মুখ্যমন্ত্ৰী তথা বৰ্ষীয়ান জেষ্ঠ কংগ্ৰেছী নেতা সদ্য প্ৰয়াত ডাঃ ভূমিধৰ বৰ্মনৰ দখলত আছিল যদিও 2016 চনৰ নিৰ্বাচনত বিজেপিৰ দখললৈ যায় সমষ্টিটো ৷ কিন্তু, 2021ৰ বিধানসভা নিৰ্বাচনত পুনৰ সমষ্টিটো আজুৰি আনিবলৈ সক্ষম হয় ডাঃ ভূমিধৰ বৰ্মনৰ পুত্ৰ দিগন্ত বৰ্মনে ৷

ভূমি বিবাদক কেন্দ্ৰ কৰি কলগাছিয়াৰ বালিকুৰি এন চি গাঁৱত দুটা ফৈদৰ মাজত সংঘাত । প্ৰতিপক্ষৰ আক্ৰমণত আহত হয় আঠ গৰাকীকৈ লোক । আহত আঠগৰাকীক বৰপেটা অসামৰিক চিকিৎসালত ভৰ্তি কৰা হৈছে ।

পুডুচেৰীৰ বিধানসভা নিৰ্বাচনত ৯ খন আসনৰ ভিতৰত ৬ খনতে জয় লাভ কৰিছে বিজেপিয়ে । এতিয়া মুখ্যমন্ত্ৰীৰ আসন কোনে অলংকৃত কৰিব সেই বিষয়ক লৈ চিন্তা-চৰ্চা চলিছে বিজেপিৰ শীৰ্ষ নেতাৰ মাজত ।

ঐতিহাসিক গুৰুদ্বাৰ ৰকাবগঞ্জৰ ভাই লাখী শ্বাহ ভাঞ্জাৰা শিখ সাম্প্ৰদায়িক হলটো অস্থায়ী ক'ভিড কেন্দ্ৰলৈ ৰূপান্তৰিত কৰা হৈছে । অক্সিজেন কনচেণ্ট্ৰেটৰ, চিকিৎসক, পেৰামেডিক্স আৰু এম্বুলেঞ্চৰ লগতে ২৫০ বিচনাযুক্ত ক'ভিড কেন্দ্ৰ স্থাপন কৰিবলৈ প্ৰস্তুতি অব্যাহত ৰাখিছে ।

সমগ্ৰ দেশতে অব্যাহত আছে কৰ'ণা মহামাৰীৰ বিভীষিকা । বিগত ২৪ ঘণ্টাত ভাৰতত মহামাৰীৰ কবলত পৰিছে ৩.৬৮ লাখ লোক আৰু প্ৰাণ হেৰুৱাইছে ৩,৪১৭ জনে ।

আমেৰিকাৰ ঔষধ কোম্পানী ফাইজাৰে ভাৰতলৈ আমেৰিকা যুক্তৰাষ্ট্ৰ, ইউৰোপ আৰু এছিয়াৰ বিতৰণ কেন্দ্ৰসমূহৰ পৰা ৭০ নিযুত আমেৰিকান ডলাৰ (৫১০ কোটিতকৈও অধিক) মূল্যৰ ঔষধ প্ৰেৰণ কৰিছে । এই ঔষধসমূহক ভাৰতৰ ক'ভিড-১৯ চিকিৎসা প্ৰট'কলৰ অংশ হিচাপে চিনাক্ত কৰা হৈছে ।