5 বজাৰ শীৰ্ষ 10 টা বাতৰি

5 বজাৰ শীৰ্ষ 10 টা বাতৰি

নগাঁৱৰ ভোগেশ্বৰী ফুকননী অসামৰিক চিকিৎসালয়ত ক’ভিডৰ চিকিৎসা চলি থকা অৱস্থাতে নিৰুদ্দেশ হৈছে এগৰাকী মহিলা ৷ ঘটনাক লৈ চাঞ্চল্যৰ সৃষ্টি হোৱাৰ লগতে চিকিৎসালয়খনৰ নিৰাপত্তা ব্যৱস্থাৰ প্ৰতি প্ৰশ্ন উত্থাপিত হৈছে ৷

নিৰ্ভীক লোকক নিজৰ ব্ৰিগেডত যোগদানৰ বাবে আহ্বান ৰাহুল গান্ধীৰ ৷ চৰকাৰৰ বিৰুদ্ধে মাত মাতিবলৈ ভয় কৰা লোকসকলক দল এৰি যোৱাৰ আহ্বান ৰাহুল গান্ধীৰ ৷ ভয়াতুৰসকলক RSSত যোগদান কৰাৰ পৰামৰ্শ কংগ্ৰেছ নেতাগৰাকীৰ ৷

কলিয়াবৰত আৰক্ষীৰ ব্যাপক তৎপৰতা ৷ হেলমেট, মাস্ক পৰিধান নকৰাকৈ মুকলি বিচৰণ কৰা বহুজনক জৰিমনা বিহে আৰক্ষীয়ে ৷ একেটা দিনতে আৰক্ষীয়ে উদ্ধাৰ কৰিলে বুজন পৰিমাণৰ সুৰা ৷

১০৭৫৫৬.২৯ কোটি টকাৰ ব্যয় প্ৰস্তাৱেৰে শুকুৰবাৰে বিয়লি বিধানসভাৰ মজিয়াত বিজেপি মিত্ৰজোঁট চৰকাৰখনৰ প্ৰথমখন বাজেট (Assam budget) দাখিল কৰিলে ৰাজ্যৰ প্ৰথম গৰাকী মহিলা বিত্তমন্ত্ৰী অজন্তা নেওগে ৷ ৰাজহুৱা খণ্ডৰ বৃহৎ বস্ত্ৰ উদ্যোগ ৰঙিয়াৰ তুলসীবাৰীৰ এপ'ল মিললৈও ধাৰ্য কৰা হৈছে ১২ কোটি টকা ।

ভৰ্তি সোণোৱাল গাঁৱৰ ভূৱণ সোণোৱাল নামৰ কৃষক জনে পথাৰত হাল বাই থাকোতেই নাঙলত লাগি উঠি আহে এটা বাটি । তাৰ পাচতে আন ছটা বাতি উদ্ধাৰ হয় সেই স্থানত ৷ বাটি কেইটাৰ তিনিটা ভগ্ন অৱস্থাত আৰু চাৰিটা নিখুঁত অৱস্থাত উদ্ধাৰ হয় ৷

নিশ্চিহ্ন হোৱাৰ দিশে চৰাইদেউ জিলাৰ সাপেখাতিৰ নেফা আলি সংযোগী পথ ৷ গৃহ সমষ্টিত ভয়ানক গৰাখহনীয়া প্ৰতিৰোধৰ বাবে কেতিয়া ব্যৱস্থা ল'ব সাংসদ তপন কুমাৰ গগৈয়ে (Tapan Gogoi) ৷

শক্তি বিভাগৰ শক্তি প্ৰদৰ্শনৰ পাছতেই তৎপৰ বিদ্যুতৰ একাংশ গ্ৰাহক ৷ বিদ্যুতৰ বিল দিবলৈ বিদ্যুৎ বিভাগৰ কাৰ্যালয়ত ভীৰ বাঢ়িছে গ্ৰাহকৰ ৷ বিদ্যতৰ বিল পৰিশোধ কৰাৰ নামত কলিয়াবৰ বৈদ্যুতিক উপ সংমণ্ডল কাৰ্যালয়ত দেখিবলৈ পোৱা গৈছে গ্ৰাহকৰ লানি নিচিগা ভীৰ ৷

যুৱ সাংবাদিক গোবিন দাসৰ স্মৃতিত সাপেখাতী চাৰিআলিত সহ সাংবাদিক সকলৰ উদ্যোগত ৰাজহুৱাভাৱে শ্ৰদ্ধাঞ্জলী অনুষ্ঠান আয়োজন কৰা হয় ৷ ১৪ তাৰিখ বুধবাৰে নিশা প্ৰায় ১০ বজাত মটৰ চাইকেলেৰে ঘৰলৈ আহি থকাৰ অৱস্থাত দুৰ্ঘটনাত পতিত হৈ মৃত্যু হয় সাংবাদিক গৰাকীৰ ৷

শিলচৰ-সৌৰাষ্ট্র ইষ্ট-ৱেষ্ট কৰিডৰ 27 আৰু 54 নং ৰাষ্ট্ৰীয় ঘাইপথ নিৰ্মাণৰ নামত হোৱা দুৰ্নীতিৰ বিৰুদ্ধে সৰৱ হৈ পৰিছে ডিমাচা ছাত্ৰ সন্থা (Dimasa Student's Union) ৷ ৰাষ্ট্ৰীয় ঘাইপথ নিৰ্মাণৰ নামত হোৱা দুৰ্নীতিৰ উচিত তদন্ত কৰিবলৈ দাবী জনাইছে ডিমাচা ছাত্ৰ সন্থাই ৷

শুকুৰবাৰে চৰাইদেউ জিলাৰ ঐতিহাসিক দগাযুঁজ ৰণকৌশল ক্ষেত্ৰত সদৌ অসম টাই আহোম যুৱ পৰিষদৰ চমুকৈ টাইপাৰ ২৬সংখ্যক প্ৰতিষ্ঠা দিৱস অনুষ্ঠিত হয় । সংগঠনটোৰ প্ৰতিষ্ঠা দিৱসৰ দিনাই কংগ্ৰেছ তথা বিজেপি চৰকাৰক তীব্ৰ সমালোচনা কৰে সংগঠনটোৰ কেন্দ্ৰীয় সমিতিৰ মুখপাত্ৰ নৱদ্বীপ বৰুৱাই ৷