চাৰি বজাৰ শীৰ্ষ বাতৰিসমূহ.....

চাৰি বজাৰ শীৰ্ষ বাতৰিসমূহ.....

কেন্দ্ৰীয় চৰকাৰৰ বন্দে ভাৰত মিছনৰ অংশ হিচাপে তৃতীয় পৰ্যায়ত এয়াৰ ইণ্ডিয়াৰ ৫ খন বিমানযোগে ভাৰতলৈ লৈ অনা হ'ব প্ৰায় ১২০০ নাগৰিকক। ১৮ জুনৰ পৰা ২৩ জুনৰ ভিতৰত লণ্ডনৰ পৰা নিজ দেশলৈ উভতাই অনা হ'ব বহিঃৰাষ্ট্ৰত আবদ্ধ লোকসকলক।

জোনাইত চাৰি যুৱকৰ দুৰ্দশা। মহাৰাষ্ট্ৰৰ পৰা আহি সাতদিন ধৰি কোৱাৰেণ্টাইন কেন্দ্ৰত কোৱাৰেণ্টাইন হৈ থকাৰ পাচতে হোম কোৱাৰেন্টাইনলৈ পঠোৱা যুৱক কেইজনৰ ঠাইৰ অভাৱৰ বাবেই পৰিত্যক্ত তথা ভূতবাংলা সদৃশ জোনাইৰ জেলখানাত থাকিবলৈ বাধ্য হয় যুৱককেইজন ।

গ্ৰীষ্মকালীন সময়ৰ সকলোৰে প্ৰিয় এবিধ ফল হৈছে লিচু ৷ অসমৰ তেজপুৰৰ পিছতে বিশেষ নাম থকা শিৱসাগৰৰ জাঁজীৰ লিচু বজাৰত প্ৰভাৱ পৰিছে লক ডাউনৰ ৷ ফলত এইবেলি বজাৰখনত ভীৰ কৰা নাই পূৰ্বৰ দৰে ক্ৰেতাই ৷

ওদালগুৰিত হাতীৰ আক্ৰমণত প্ৰাণ গ'ল এজন কৃষকৰ ৷ পথাৰত হাল বাই থকা অৱস্থাত নিহত হয় লোকজন ৷ ইতিমধ্যে লোকজনৰ মৃতদেহ মৰণোত্তৰ পৰীক্ষাৰ বাবে ওদালগুৰি অসামৰিক চিকিৎসালয়লৈ প্ৰেৰণ কৰিছে ডিমাকুছি আৰক্ষীয়ে ৷

বহিঃৰাজ্যৰ পৰা অসম অভিমুখে অহা এটা 56 জনীয়া শ্ৰমিকৰ দলে গন্তব্যস্থান পোৱাৰ পূৰ্বে পলায়ন কৰে ৰে’লৰ পৰা ৷ পৰৱৰ্তী সময়ত হোজাই ৰে’ল আৰক্ষীৰ তৎপৰতাত আটক হয় শ্ৰমিকৰ দলটো ৷

গাঁও জিলাৰ পশ্চিম প্ৰান্তৰ আমচৈৰ কেঁকোৰা গাঁৱত বুধবাৰে পুৱা বিদ্যুৎস্পৃষ্ট হৈ এটা বন্যহস্তীয়ে মৃত্যুক আঁকোৱালি লয় ৷ আমচৈৰ কেঁকোৰা গাঁৱৰ চাৰ্থে ৰংপী নামৰ লোক এজনৰ বাৰীত সংঘটিত হয় এই অঘটন ৷ হাতীৰ উপদ্ৰৱৰ পৰা ৰক্ষা পাবলৈ লোক গৰাকীয়ে ঘৰৰ বাৰীত সংযোগ কৰিছিল এটা বিদ্যুৎ পৰিবাহী লাইটৰ খুটা ৷

মংগলদৈত দক্ষিণ কোৰিয়াৰ পৰা অত্যাধুনিক চেনিটাইজাৰ মেচিন আমদানি কৰা হৈছে ৷ অতি কম খৰচতে এই মেচিনটোৰ জৰিয়তে বিভিন্ন অঞ্চল চেনিটাইজ কৰিব পাৰিব বুলি স্বত্বাধিকাৰী ৱাহিদুৰ ৰহমানে উল্লেখ কৰে ৷

বাক্সাৰ তামুলপুৰত উদ্ধাৰ অজগৰ ৷ ৰমেন দাস নামৰ এগৰাকী ব্যক্তিৰ খেতিপথাৰত পাতি থোৱা জালত বন্দী হয় অজগৰটো ৷

হাইলাকান্দিৰ কাঠলিছেড়া সমষ্টিৰ বিলাইপুৰ গাঁৱৰ পঞ্চায়ত সভাপতি আহমেদ হুছেইনৰ বিৰুদ্ধে উত্থাপন হৈছে প্ৰধানমন্ত্ৰী দৰিদ্ৰ কল্যাণ যোজনাত অনিয়মৰ অভিযোগ ৷

বানৰ কৱলত পুৰণিগুদাম চলচলিৰ দুই শতাধিক কৃষক ৷ বন্ধন বেংকৰ পৰা ঋণ লৈ কৰা বৰো ধানৰ খেতি এতিয়া পানীৰ তলত ৷