3 বজাৰ শীৰ্ষ দহটা বাতৰি...

3 বজাৰ শীৰ্ষ দহটা বাতৰি...

আদালতলৈ প্ৰেৰণ কৰা হৈছে JEE পৰীক্ষা কাণ্ডত জড়িত অভিযুক্তসকলক ৷ বুধবাৰে নিশা আটাইকেইজনক JEE কেলেংকাৰীৰ সন্দৰ্ভত জড়িত থকাৰ অপৰাধত গ্ৰেপ্তাৰ কৰিছিল মহানগৰ আৰক্ষীয়ে ।

কাঁহি-বাতি বজাই প্ৰতিবাদ সাব্যস্ত লাহোৱালৰ চাহ শ্ৰমিকসকলৰ ৷ বিজেপিৰ দলীয় সভাৰ পৰা কিছু নিলগত এনেদৰে প্ৰতিবাদ সাব্যস্ত কৰে প্ৰাপ্যৰ পৰা বঞ্চিত মটক চাহ বাগিচাৰ শ্ৰমিকসকলে ৷

ভূমি বেদখলৰ দৰে ঘটনা সংঘটিত হৈছে মাৰ্ঘেৰিটাত ৷ ক’ল ইণ্ডিয়াৰ নামত অধিকৃত ভূমি এইবাৰ বেদখল কৰিছে কোনো দুষ্টচক্ৰই ৷ কেৱল বেদখল কৰাতে ক্ষান্ত নাথাকি উক্ত ভূমিত বহু সন্দেহজনক লোকে নিৰ্মাণ কৰিছে অবৈধ বাসগৃহ ৷

ভাৰতত কৰ’ণা ভাইৰাছত আক্ৰান্তৰ সংখ্যা 80,40,203 গৰাকীলৈ বৃদ্ধি হৈছে ৷ এই পৰ্যন্ত ভাইৰাছবিধত আক্ৰান্ত হোৱাৰ পিছত আৰোগ্য লাভ কৰিছে প্ৰায় 73,15,989 লাখ লোকে ৷ এই তথ্য প্ৰকাশ কৰিছে কেন্দ্ৰীয় স্বাস্থ্য মন্ত্ৰালয়ে ৷

গোলাঘাটৰ ৰাজপথত 21 অক্টোবৰৰ পৰা 31 অক্টোবৰলৈ ভাৰতীয় আৰক্ষী পতাকা দিৱস পালন গোলাঘাট আৰক্ষীৰ ৷ আৰক্ষী বিষয়া উৎপল চেকনিধৰাই আঁত ধৰিছে এই সাংস্কৃতিক অনুষ্ঠানৰ ৷

শুকুৰবাৰে অনুষ্ঠিত হ’ব ধনৰ অধিষ্ঠাত্ৰী দেৱী লক্ষ্মীৰ পূজা ৷ সেই উপলক্ষে বিৰ দি বাট নোপোৱা অৱস্থা আশা কৰা হৈছিল ৰাজ্যৰ বজাৰসমূহত ৷ কিন্তু এইবাৰ কৰ’ণাৰ বাবে ক্ৰেতা আৰু বিক্ৰেতাৰ এখন বিপৰীত ছবিহে পৰিলক্ষিত হ’ল বজাৰসমূহত ৷

বৃহস্পতিবাৰে মূল্যবৃদ্ধিৰ বিৰুদ্ধে গুৱাহাটী মহানগৰীৰ বেলতলা বজাৰত প্ৰতিবাদ সাহসী মহিলা মঞ্চ নামৰ সংগঠনটোৰ ৷ বিভিন্ন চৰকাৰ বিৰোধী শ্ল’গান দিয়াৰ লগতে শীঘ্ৰেই মূল্যবৃদ্ধি ৰোধ কৰিবলৈ চৰকাৰক দাবী জনায় সংগঠনটোৱে ৷

পুনৰ চৰ্চালৈ আহিছে JEE পৰীক্ষাৰ কেলেংকাৰী ৷ ইতিমধ্যে JEE কাণ্ডক কেন্দ্ৰ কৰি তোলপাৰ লাগিছে ৰাজ্যত ৷ মহানগৰ আৰক্ষীয়ে ঘটনা সন্দৰ্ভত বুধবাৰে নিশা গ্ৰেপ্তাৰ কৰে পাঁচজনকৈ লোকক ।

অসমৰ ব্যৱসায়ীক মেঘালয়ত প্ৰৱেশত বাধা দিছে মেঘালয় চৰকাৰে ৷ এই কাৰ্যৰ পিচতে জাঙুৰ খাই উঠিছে গোৱালপাৰা জিলাৰ ছটাকৈ সংগঠন ৷

নাগালেণ্ড আৰু মিজোৰাম বিশ্ববিদ্যালয়ৰ স্নাতকোত্তৰ পাঠ্যক্ৰমৰ নামভৰ্তিৰ অন্তিম তাৰিখ ৫ নৱেম্বৰ, বঞ্চিত হ'ব অসমৰ হাজাৰ হাজাৰ শিক্ষাৰ্থী ।