ডিমা হাছাওৰ কৰ’ণা সংক্ৰমণক লৈ সষ্টম প্ৰশাসন
সোমবাৰে ডিমা হাছাওত 13 গৰাকীকৈ লোক কৰ’ণাত আক্ৰান্ত ৷ এতিয়ালৈকে জিলাখনত আক্ৰান্তৰ সংখ্যা বৃদ্ধি পাইছে 73 গৰাকীলৈ ৷ উপায়ুক্তৰ কাৰ্যালয়ত অনুষ্ঠিত এক জৰুৰী বৈঠকত মিলিত হৈ সকলোকে চৰকাৰী নিৰ্দেশনা তথা স্বাস্থ্য বিধি মানি চলাৰ আহ্বান উপায়ুক্ত পল বৰুৱাৰ ৷
ডিব্ৰুগড়ৰ বিধ্বংসী অগ্নিকাণ্ডত জাহ গ'ল 6টাকৈ বাসগৃহ
ডিব্ৰুগড়ৰ চানমাৰি ঘাটত সোমবাৰে নিশা সংঘটিত হৈছে এক বিধ্বংসী অগ্নিকাণ্ড । জুইৰ লেলিহান শিখাই নিমিষতে আৱৰি ধৰে ছটাকৈ বাসগৃহৰ লগতে এখন দোকান ৷ মমবাতিৰ পৰা সূত্ৰপাত হোৱা জুয়ে মুহুৰ্ততে নিঃশেষ কৰে বাসগৃহৰ লগতে সা-সামগ্ৰীসহ বিপণীখন ৷ ৰাজু সিং নামৰ যুৱকজনৰ বাসগৃহত সংঘটিত এই অগ্নিকাণ্ডত বিনষ্ট হয় লক্ষাধিক মূল্যৰ সামগ্ৰী ৷ ডিব্ৰুগড়ৰ অগ্নি নিৰ্বাপক বাহিনীয়ে কেইবাখনো বাহনৰ সহায়ত জুই নুমুৱাবলৈ সক্ষম হোৱাত বৃহত্তৰ জনবসতিপূৰ্ণ অঞ্চলটো জুইৰ কবলৰ পৰা ৰক্ষা পৰে ৷
চুমিলা ৰংহাংপীৰ হত্যা: হোজাইত উত্তাল প্ৰতিবাদ
সোমবাৰে হোজাই জিলাৰ বৰবহাত জিলা কাৰ্বি ছাত্ৰ সন্থা আৰু কেইবা শতাধিক কাৰ্বি জনগোষ্ঠীয় লোকৰ প্ৰতিবাদ ৷ চুমিলা ৰংহাংপীৰ হত্যাকাণ্ডৰ অভিযুক্তক ফাঁচী প্ৰদানৰ দাবী প্ৰতিবাদকাৰীৰ ৷
বিলাসীপাৰাত 36 গৰাকীলৈ বৃদ্ধি ক’ভিড ৰোগী
বিলাসীপাৰাত সোমবাৰে স্বাস্থ্য কৰ্মীসহ 11 গৰাকী লোক কৰ’ণাত আক্ৰান্ত ৷ সম্প্ৰতি আক্ৰান্তৰ সংখ্যা বৃদ্ধি পাইছে 36 গৰাকীলৈ ৷
পত্নীক হত্যা কৰি নদীত জপিয়াই পলায়নৰ চেষ্টা স্বামীৰ
ত্ৰিপুৰাত সোমবাৰে সংঘটিত কাজিয়াৰ পৰিণতিত পত্নীক হত্যা কৰি আৰক্ষীৰ পৰা পলাই সাৰিবলৈ গোমতী নদীত জপিয়াই স্বামীয়ে ৷ অৱশ্যে কেইবাঘণ্টা জোৰা প্ৰচেষ্টাৰ অন্তত আৰক্ষীয়ে আটক কৰে অভিযুক্তক ৷
নলবাৰীত প্ৰথম গৰাকী কৰ'ণা ৰোগীৰ মৃত্যু
নিজ বাসগৃহত আইছ’লেচনত থকা অৱস্থাতে নলবাৰীত মৃত্যু ঘটে কৰ'ণা ৰোগীৰ ৷ ঘগ্ৰাপাৰ প্ৰাথমিক স্বাস্থ্য কেন্দ্ৰৰ অন্তৰ্গত সানেকুছি ৰাজ্যিক চিকিৎসালয়ৰ অন্তৰ্গত লৰমা বটাকুছি গাঁৱৰ মজিবৰ ৰহমান নামৰ লোকজনৰ দেহত তিনিদিন পূৰ্বে কৰ'ণাৰ উপস্থিতি ধৰা পৰিছিল ৷ মঙলবাৰে দুপৰীয়া ৰহমানৰ মৃত্যু হয় ৷
পাঠশালাত ৰাষ্ট্ৰীয় ঘাইপথে জীয়াতু ভোগাইছে ৰাইজক
পথ, দলং মেৰামতিৰ বাবে প্ৰায় এমাহ ধৰি বন্ধ হৈ আছে পাঠশালাৰ 31নং ৰাষ্ট্ৰীয় ঘাইপথৰ একাংশ এলেকা । যাৰ ফলত সঘনাই দুৰ্ঘটনা সংঘটিত হোৱাৰ অভিযোগ উত্থাপন কৰিছে স্থানীয় ৰাইজে ৷ উল্লেখ্য যে, ৰাষ্ট্ৰীয় ঘাইপথ প্ৰাধিকৰণ বিভাগৰ চূড়ান্ত গাফিলতি আৰু পথ নিৰ্মাণকাৰী সংন্থাৰ অকৰ্মণ্যতাৰ ফলত পাঠশালাত যাতায়াতৰ ক্ষেত্ৰত দুৰ্ভোগ ভূগি অহাৰ অভিযোগ উত্থাপন কৰিছে স্থানীয় লোকে ৷ পাঠশালাৰ সমীপৰ টুৰকুনি জানৰ ওপৰত অৱস্থিত পকী দলংখনৰ এপ্ৰ’চ অংশত ফাঁট মেলাৰ বাবে পথ নিৰ্মাণকাৰী সংস্থাই পথটোৰ একাংশ প্ৰায় এমাহ ধৰি বন্ধ কৰি দি ওৱান ৱে কৰি দিয়ে ৷ কিন্তু বৰ্তমানলৈকে পথ নিৰ্মাণেই হওঁক বা দলং খন মেৰামতি কৰাৰ ক্ষেত্ৰত চূড়ান্ত গাফিলতি প্ৰদৰ্শন কৰি আহিছে বিভাগীয় কৰ্তৃপক্ষই । যাৰ ফলত ডিভাইডাৰ অংশত সঘনাই সংঘটিত হৈ আহিছে দুৰ্ঘটনা ।
লংকাত মহিলাৰ আত্মহত্যাক কেন্দ্ৰ কৰি উত্তপ্ত পৰিস্থিতি
লংকাৰ 10 নং ৱাৰ্ডত এগৰাকী মহিলাৰ আত্মহত্যাক কেন্দ্ৰ কৰি গাঁৱবাসীয়ে সৃষ্টি কৰে উত্তপ্ত পৰিস্থিতি ৷
জাগীৰোডৰ কাগজ কলত চোৰৰ তাণ্ডৱ
চোৰৰ তাণ্ডৱ চলিছে জাগীৰোডৰ কাগজ কলত । অপৰাধীৰ ৰম্যভূমিলৈ পৰ্যবসিত হৈছে জাগীৰোডৰ শিলভঙা অঞ্চল ।
কাৰ্বি আংলঙত বৃদ্ধৰ কামনাৰ বলি কিশোৰী
কাৰ্বি আংলং জিলাৰ পাৰখোৱাত এগৰাকী বৃদ্ধৰ কামনাৰ বলি হয় বাৰ বছৰীয়া এগৰাকী কিশোৰী ৷ অভিযুক্ত লোকজন হাওৰাঘাট অককেৰেং এৰাদীঘলপানী গাঁৱৰ মতিলাল ক্ৰ' ৷ ভুক্তভোগীৰ মাতৃৰ অভিযোগৰ ভিত্তিত আৰক্ষীয়ে ডকমকা থানাত পক্স’ আইনৰ অধীনত গোচৰ পঞ্জীয়ন কৰি অভিযুক্তক আটক কৰে ৷
