গুৱাহাটী,৩১ মে': কামৰূপ (মহানগৰ) জিলাত ডিচেম্বৰৰ ভিতৰত মিজেল্ছ (Measles) বা সৰুআই আৰু ৰুবেলা (Rubella) ৰোগ নিৰ্মূল কৰাৰ লক্ষ্য নিৰ্ধাৰণ কৰিছে কামৰূপ মহানগৰ জিলা প্ৰশাসনে (Target to eradicate measles and rubella in December) । জিলাখনত ডিচেম্বৰৰ ভিতৰত মিজেল্ছ (Measles) বা সৰুআই আৰু ৰুবেলা (Rubella) ৰোগ নিৰ্মূল কৰাৰ লক্ষ্যত উপনীত হ'বলৈ মহানগৰ জিলা প্ৰশাসনে ইতিমধ্যে জিলা টাস্ক ফ'ৰ্চ গঠন কৰিছে (Kamrup Metropolitan District Administration) ।
এই লক্ষ্যত উপনীত হ'বলৈ কামৰূপ (মহানগৰ) জিলাত ল'বলগীয়া পদক্ষেপ সন্দৰ্ভত বুধবাৰে জিলা উপায়ুক্ত কাৰ্যালয়ৰ সভাকক্ষত অনুষ্ঠিত কৰা হয় এখনি আলোচনা চক্ৰ (Kamrup metro DC meeting) ৷ জিলা উপায়ুক্ত পল্লৱ গোপাল ঝাৰ অধ্যক্ষতাত অনুষ্ঠিত সৰুআই আৰু ৰুবেলা সম্পৰ্কীয় জিলা টাস্ক ফ'ৰ্চৰ বৈঠকত ৰোগ দুবিধৰ নিৰ্মূলকৰণৰ বাবে প্ৰতিষেধক প্ৰদানকে ধৰি গ্ৰহণ কৰা আৰু কৰিবলগীয়া পদক্ষেপসমূহৰ বিষয়ে বিস্তৃতভাৱে আলোচনা কৰা হয় ৷
বৈঠকত বিশ্ব স্বাস্থ্য সংস্থাৰ কলচাল্টেন্ট চিকিৎসক (Consultant doctor of WHO) ডাঃ অৰূপ ডেকাই মিজেল্ছ (Measles) বা সৰুআই আৰু ৰুবেলা (Rubella)ৰ ভয়াৱহতাৰ কথা ব্যাখ্যা কৰে ৷ তেওঁ জনায় যে সৰুআই আৰু ৰুবেলা ৰোগৰ প্ৰতিষেধকৰ প্ৰথম পালি শিশুৰ জন্মৰ ৯ মাহৰ পৰা ১২ মাহৰ ভিতৰত আৰু দ্বিতীয় পালি ১৬ মাহৰ পৰা ২৪ মাহত দিব লাগে ৷ কামৰূপ মহানগৰ জিলাত ২০২২-২৩ বৰ্ষত সৰুআই আৰু ৰুবেলা প্ৰতিষেধকৰ দ্বিতীয় পালি ৮৬ শতাংশক দিয়া হৈছে ৷ ৰাজ্যিক পৰ্যায়ত এই হাৰ হৈছে ৮৪ শতাংশ ৷ কামৰূপ মহানগৰ জিলাত এতিয়ালৈকে সৰুআই আৰু ৰুবেলা ৰোগৰ প্ৰাদুৰ্ভাৱ হোৱা নাই বুলি সদৰী কৰে ডাঃ ডেকাই ৷
