গুৱাহাটী, 5 আগষ্ট: যোৱা দুমাহ ধৰি ৰাজ্যৰ ৩৩ খন জিলাৰ 25 খনতকৈয়ো অধিক জিলাত বানে তাণ্ডৱ চলোৱাৰ পাচত এতিয়া, উৎকট গৰমে দহিছে ৰাজ্যবাসীক ৷ বান প্ৰভাৱিত জিলা সমূহত পৰিস্থিতি স্বাভাৱিক হ'বলৈ ধৰিছে যদিও, গৰমৰ মাত্ৰা বৃদ্ধি পোৱাত বানাক্ৰান্ত ৰাইজৰ আন কিছুমান জটিল সমস্যাই দেখা দিছে ৷ যোৱা চাৰি দিন ধৰি ৰাজ্যত বৃদ্ধি পোৱা গৰমৰ ফলত বান বিধ্বস্ত অঞ্চলসমূহত উকমুকনি দিছে ডায়েৰিয়া, বমি আৰু ভিন্ন ছালৰ ৰোগে ৷ উল্লেখ্য যে, বৰ্তমানেও ১৫ খন জিলাৰ ২৩ টাকৈ ৰাজহ চক্ৰৰ ৩০৮ খন গাঁও প্লাবিত হৈ আছে প্ৰলয়ংকাৰী বানত ৷
এনে ক্ষেত্ৰত বান প্ৰভাৱিত অঞ্চল সমূহৰ ৰাইজ অধিক সতৰ্ক হোৱাৰ প্ৰয়োজন ৷ খোৱা-বোৱাৰ ক্ষেত্ৰত অধিক সতৰ্কতা মানি চলাৰো প্ৰয়োজন বানাক্ৰান্ত ৰাইজে ৷ মঙলবাৰে গুৱাহাটী মহানগৰীত তাপমাত্ৰাই অতিক্ৰম কৰিলে ৩৭ ডিগ্ৰী ৷ ইয়াৰোপৰি ৰাজ্যৰ আন আন স্থানসমূহতো প্ৰায় সম পৰ্যায়ৰ তাপমাত্ৰাই অতিষ্ঠ কৰি তুলিছে ৰাইজক ৷
লগতে পঢ়ক: বানত ক্ষতিগ্ৰস্ত বৰপেটাৰ মৰাপাট খেতিয়কসকল
